Sahib Məmmədov: "İşçilər pensiya yaşına çatanda belə, öz hüquqlarını tələb etmək üçün bir vaxtlar işlədikləri rəhbəri məhkəməyə verərək öz hüququnu tələb edə bilər"
İşçilərin hüquqlarının qorunması məsələsi dəfələrlə müzakirə mövzusu olub. Onların hüquqları ilə bağlı baş nazirin müavini, Əmək Münasibətlərinin Tənzimlənməsinin Təkmilləşdirilməsi və Koordinasiyası Komissiyasının sədri Əli Əhmədov Sumqayıtda keçirilən tədbirdə bildirib.
O qeyd edib ki, bəzən işəgötürənlər işçilərin hüquqlarını lazımi səviyyədə qoruya bilmir. Bu səbəbdən hökumət əmək münasibətlərinin tənzimlənməsinə ciddi fikir verir ki, gələcəkdə pensiya alanların hüquqları pozulmasın. Bu tamamilə ədalətli yanaşmadır. Belə halın aradan qaldırılması üçün yollar tapmalıyıq. Əks təqdirdə, pensiya yaşına çatanda vətəndaşlar sahibkarları, iş adamlarını məhkəməyə verərək öz haqlarını tələb edəcək. Hər bir vətəndaşın buna tam haqqı var. Bu baxımdan sahibkarlar zəruri addımları indidən atmalıdır.
Vətəndaşların Əmək Hüquqları Liqasının sədri Sahib Məmmədov "Bakı-Xəbər"ə açıqlamasında qeyd etdi ki, Əli Əhmədov qeyri-formal əmək bazarından danışıb: "Azərbaycanın əmək bazarının 60 faizdən yuxarısı qeyri-formal əmək bazarıdır. Çalışan hər üç nəfərdən yalnız birinin əmək müqaviləsi var. Bu səbəbdən də baş nazirin müavini məlum məsələyə toxundu. Və qeyd etdi ki, əmək müqaviləsinin, işçi ilə rəsmi münasibətin olmadığı yerdə əmək hüququndan danışmaq olmaz. Doğrudan da bu, Azərbaycan üçün ciddi problemdir. Bu yeni problem deyil".
Həmsöhbətimizin sözlərinə görə, gələcəkdə çalışan, əmək sərf edən hər bir insanın pensiya alması üçün onlarla əmək müqaviləsi imzalanmalıdır: "Əgər idarənin rəhbəri işçi ilə iş münasibətini rəsmiləşdirmək istəmirsə, o zaman işçi bu barədə aidiyyəti qurumlara müraciət edə bilər. Və onun hüquqları lazımi səviyyədə qorunar. İşçilər hər zaman öz hüquqlarını tələb etməlidir. Onu da deyim ki, işçilər pensiya yaşına çatanda belə, öz hüquqlarını tələb edə bilər. Onlar bir vaxtlar işlədikləri rəhbəri məhkəməyə verərək öz hüququnu tələb edər. Gələcəkdə bu kimi halların yaşanmaması üçün sahibkarlar və ya rəhbərlər müəyyən addımlar atmalıdır".
Günel CƏLİLOVA
