Vüqar Bayramov: "İpoteka kreditinin onlayn şəkildə verilməsi banklarda ipoteka kreditlərinin verilməsi ilə bağlı şəffaflığın artırılmasına səbəb olacaq"
Məlumdur ki, mənzilə sahib olmaq istəyənlərin bir qismi ipoteka krediti əldə edir. O da sirr deyil ki, ipoteka kreditlərinin alınması elə də asan deyil. Amma avqustun 1-dən etibarən vətəndaşın ipoteka krediti almaq imkanları daha da asanlaşır. Belə ki, banklara artıq elektron yolla da müraciət etmək mümkün olacaq. Bu isə elektron ipoteka sisteminin elektron hökumət portalına inteqrasiyası hesabına mümkün olacaq.
Onu da qeyd edək ki, istər adi, istərsə də sosial ipoteka kreditini bu yolla əldə etmək mümkün olacaq. Yəni vətəndaş elektron portala daxil olmaqla istənilən məbləği, istənilən bankı seçməklə müraciətini reallaşdırmış olacaq.
Ekspertlərin fikrincə, elektron müraciət ilk növbədə prosedurların dəfələrlə sadələşməsinə səbəb olacaq. Elektron müraciət formasında ipoteka ilə mənzil alınması barədə fikir bildirən iqtisadçı ekspert Vüqar Bayramov "Bakı-Xəbər"ə açıqlamasında qeyd etdi ki, artıq onlayn ipoteka sisteminin elektron hökumət portalına transferi başa çatıb: "Elektron hökumət portalını istifadə etməklə onlayn ipoteka kreditlərinə müraciət etmək mümkündür. Bu sistemin ipoteka kreditlərinə əlçatanlığı baxımından bir sıra müsbət tərəfləri var. İlk olaraq onu deyim ki, ipoteka kreditlərinin onlayn şəkildə verilməsi zamanı vətəndaşlar daha qısa zaman çərçivəsində sənəd təqdim etməklə mənzil sahibi ola bilərlər. Bu qayda həm vaxta, həm də vəsaitə qənaət edilməsinə səbəb olacaq. Çünki vətəndaşlar qısa zamanda daha az sənəd tərtib etməklə onlayn şəkildə ipoteka kreditindən istifadə edə bilər. Nəzərə almaq lazımdır ki, əvvəlki dönəmlərdə ipoteka krediti üçün lazım olan sənədlərin sayı kifayət qədər çox idi. Elektron hökumət portalı vasitəsilə ipoteka kreditlərinə müraciət reallaşdığı üçün bəzi məlumatlar avtomatik olaraq həmin portalda görünəcək".
Həmsöhbətimiz onu da bildirdi ki, bu sistemin reallaşması
banklarda ipoteka kreditlərinin verilməsi ilə bağlı şəffaflığın artırılmasına səbəb olacaq: "Apardığımız monitorinqlərə əsasən deyə bilərik ki, bəzi hallarda əvvəllər banklar vətəndaşların müraciətinə gec baxırdı.
Elə hallar olub ki, bir vətəndaşın müraciətinə bir həftə, başqa birisinə isə aylarla baxılmayıb. Elektron sistemin formalaşması müraciətlərin sıralanmasına səbəb olacaq. Nəticə etibarı ilə bu, şəffaflığın artırılması deməkdir".
Günel CƏLİLOVA
