Məlum olduğu kimi, Azərbaycanın qeyri-neft sektorunda istehsal etdiyi məhsullar üçün yeni mühüm bazarlar qismində ərəb ölkələri çıxış edir. Bu səpkidə həyata keçirilən işlərin nəticəsi göstərir ki, ərəb ölkələrində əslində Azərbaycan məhsullarına maraq kifayət qədər böyükdür.
Belə görünür ki, ərəb dövlətləri ilk növbədə ərzaq, o cümlədən aqrar məhsulları böyük həcmdə Azərbaycandan idxal etməyə hazırdır. Bunu müxtəlif ərəb ölkələri rəsmilərinin açıqlamaları da təsdiq edir. Məsələn, Dubayın hakimi Şeyx Məhəmməd bin Raşid Əl Məktum Azərbaycanın kənd təsərrüfatı məhsullarının yüksək keyfiyyətə malik olduğunu bildirir və ölkəmizin meyvə-tərəvəz məhsullarının Birləşmiş Ərəb Əmirliklərinə ixracının artırılmasında maraqlı oloduqlarını vurğulayır.
Bəhreyn Kral ailəsinin üzvü, "Riyad Şirkətlər Qrupu"nun prezidenti Şeyx Dheya Bin İbrahim Əl Xəlifə də bildirir ki, Azərbaycan məhsullarının keyfiyyəti ilə bağlı zəngin məlumatlara malikdir və Bəhreyndə Azərbaycan məhsullarının satış şəbəkəsinin yaradılmasına dəstək verməyə hazırdır. Ekspertlər hesab edir ki, ölkəmizin ilk növbədə kənd təsərrüfatı məhsullarının ixracı ilə əlaqədar potensialı genişdir. Digər tərəfdən bu məsələ ilə əlaqədar hökumətin xüsusi proqramları var. Bundan əlavə, ixracla məşğul olan şirkətlərə müəyyən güzəştlər də var. Bu arada qeyd edək ki, Azərbaycan məhsullarının Körfəz ölkələrinə daşınması üçün nəqliyyat logistika layihəsinin hazırlanması gündəmə gəlib. Hesab edilir ki, bunun reallaşması Azərbaycandan ərəb ölkələrinə daha böyük həcmdə məhsul ixracına imkan verəcək. Qeyd edək ki, nəqliyyat logistika layihəsinin reallaşması məqsədilə "Ərzaq məhsullarının tədarükü və təchizatı" Açıq Səhmdar Cəmiyyətinin nümayəndə heyəti Bəhreyn Krallığında işgüzar səfərdə olub. Məlumatlara görə, krallığı təmsil edən "Mumtalakat Holding"in prezidenti Mahmud Alkhocayi ilə keçirilən görüşdə holdinqlə Səhmdar Cəmiyyət arasında tərəfdaşlıq münasibətlərinin yaradılması, kənd təsərrüfatı istehsalının bir sıra sahələrinə investisiyanın qoyulması, Azərbaycan məhsullarının Körfəz ölkələrinə daşınması üçün nəqliyyat logistika layihəsinin hazırlanması qərara alınıb. "Arcapita" İnvestisiya Fondunda keçirilən görüşdə fondun baş icraçı direktoru Atif Əbdülmalik bildirib ki, fond 70 müəssisəyə təxminən 30 milyard dollar həcmində investisiya yönəldib, bu istiqamətdə Azərbaycan şirkətləri ilə birgə əməkdaşlıq qurula bilər. Azərbaycanın iqtisadi potensialı haqda Səhmdar Cəmiyyət nümayəndələri geniş təqdimatla çıxış ediblər. Atif Əbdülmalik Azərbaycanda tikintisi nəzərdə tutulan logistika mərkəzi layihəsində iştirak etməkdə maraqlı olduqlarını bildirib.
"Bəhreyn İqtisadi İnkişaf Şurası"nın icraçı direktoru Simon Qalpin isə bildirib ki, Şura Azərbaycandan ərzaq məhsullarının ixracı, logistika imkanlarının genişləndirilməsi ilə əlaqədar olaraq bu sahələrə dövlət dəstəyinin göstərilməsində maraqlıdır. Bundan əlavə, Bəhreyn şirkətləri üçün Azərbaycan məhsullarının təqdimat sərgisi keçirilib. Ekspertlər hesab edir ki, bütün bunlar ərəb ölkələrinə daha çox həcmdə Azərbaycan məhsullarının ixracına imkan verəcək.
Ekspertlər hesab edir ki, ərəb ölkələrinin bazarlarına ilk növbədə kənd təsərrüfatı məhsullarının çıxarılmağa başlanması Azərbaycanda bu sahənin inkişafına əlavə təkan verəcək. Digər tərəfdən, Azərbaycanın ənənəvi MDB məkanından əlavə, dünyanın dünyanın digər ölkələrinə də kənd təsərrüfatı məhsullarını çıxarmağa başlaması həm də o deməkdir ki, ölkəmizin beynəlxalq tələblərə cavab verən istehsal potensialı var. Daha bir vacib fakt odur ki, xaricə çıxış imkanlarının genişlənməsi fonunda istehsalçı daha çox məhsul yetişdirib onun satılmasında maraqlı olacaq. Bu isə daxili istehsal həcminin artması deməkdir. Ümumiyyətlə, ərəb ölkələrinə çıxış əldə edilməsi yerli keyfiyyətli məhsullar üzrə istehsal prosesinin artmasına gətirib çıxaracaq. Azərbaycanda aqrar sektorda istehsal imkanlarının genişləndirilməsi, əsasən də keyfiyyətli, rəqabətə davamlı məhsul istehsalının formalaşdırılması ölkə üçün yeni bazarların əldə edilməsi baxımından da vacib əhəmiyyət kəsb edir. İndilikdə ərəb ölkələrinin təbii şəraiti nəzərə alınarsa, onların kənd təsərrüfatı, xüsusən də Azərbaycanda istehsal olunan məhsullara ehtiyacları kifayət qədər yüksəkdir. Belə vəziyyət Azərbaycanın gələcəkdə istehsal etdiyi aqrar məhsulunun ixracatda xüsusi paya malik olmasına şərait yaradır.
Tahir TAĞIYEV
