Günel Fərhadqızı: "Hesab edirəm ki, bunun özü də ölkəmizin ciddi nailiyyətlərə imza atdığından xəbər verir"
"Cənub-Qərb" nəqliyyat marşrutu layihəsinin inkişaf etdirilməsində, həmçinin, bu marşrut üzrə daşımaların həyata keçirilməsində təşkilati, texnoloji və logistik məsələlərin həllində tərəflərin atdığı addımların koordinasiyası, "Cənub-Qərb" nəqliyyat marşrutu katibliyinin və əməliyyat-iş mərkəzinin yaradılması məsələlərinin müzakirəsindən sonra Azərbaycan, Gürcüstan, İran, Ukrayna və Polşanın dəmir yolları rəhbərləri arasında bir sıra sənədlər imzalanıb.
Müzakirələrdən sonra Hindistan-Fars Körfəzi-İran-Azərbaycan- Gürcüstan-Ukrayna-Avropa istiqaməti üzrə daşımaların optimallaşdırılmasına və həmçinin, tərəflərin tranzit potensialının artırılmasına xidmət edəcək "Cənub-Qərb" nəqliyyat marşrutu üzərində əməkdaşlıq imkanlarının genişləndirilməsi qərara alınıb. Eyni zamanda, iştirakçı ölkələrin dəmir yolları tərəfindən "Cənub-Qərb" nəqliyyat marşrutu üzrə daşınacaq yüklərə güzəştli tariflərin tətbiqi məsələsinin araşdırılması da məqsədəuyğun sayılıb.
Əldə olunmuş razılığa əsasən, "Cənub-Qərb" marşrutu üzrə Azərbaycan, Gürcüstan, İran, Ukrayna və Polşanın dəmir yolları arasında koordinasiya işləri "Azərbaycan Dəmir Yolları" QSC-yə həvalə edilib. Qeyd edək ki, "Cənub-Qərb" marşrutu üzrə strateji əhəmiyyətli məsələlər, həmçinin, marşrutun inkişaf perspektivləri Koordinasiya Komitəsi tərəfindən həll olunacaq. Marşrut üzrə yüklərin daşınmasında mövcud olan və yarana biləcək maneələrin aşkar edilməsi və aradan qaldırılması məqsədilə Koordinasiya Komitəsinin nəzdində Azərbaycan, Gürcüstanı, İran, Ukrayna və Polşa dəmir yollarının nümayəndələrindən ibarət İşçi Qrup yaradılacaq.
Bu cür mühüm layihədəki koordinasiya işlərinin Azərbaycana həvalə olunması nədən xəbər verir?
İqtisadçı Günel Fərhadqızı qəzetimizə açıqlamasında bildirdi ki, bu hadisə Şərqlə-Qərbin, Şimal ilə Cənubun qovşağında yerləşən, unikal coğrafi mövqeyə malik olan Azərbaycanın dünyanın nəqliyyat sektorunda baş verən proseslərdən kənarda qalmadığına işarədir: "Cənub-Qərb" nəqliyyat dəhlizinin iştirakçıları bu ilin sonunadək 200 min ton yük daşımağı planlaşdırır. Nəqliyyat dəhlizi Avropa Birliyi ilə Hindistan arasında yüklərin daşınmasına hesablanıb. Dəhliz İran, Azərbaycan, Gürcüstan, Ukrayna vasitəsilə Hindistandan Avropaya və əks istiqamətdə yüklərin daşınmasında vaxt itkisini azaldır. İlkin hesablamalara əsasən, bu dəhliz üzrə yük daşımaları 7 gün ərzində həyata keçirmək mümkündür. Alternativ marşrutlarda çatdırılma vaxtı 35-37 gün təşkil edir. Yəni olduqca optimal olan bu layihə bütün iştirakçı dövlətlər üçün mühüm əhəmiyyətə malikdir. Təbii ki, belə geniş layihədəki işlərin uğurlu olması üçün koordinasiyanın düzgün qurulması vacibdir. Azərbaycanın həm məkanca yerləşdiyi mövqe, həm də infrastruktur imkanları belə koordinasiyanı həyata keçirməyə tam imkan verir. Hesab edirəm ki, bunun özü də ölkəmizin ciddi nailiyyətlərə imza atdığından xəbər verir".
Məhəmmədəli QƏRİBLİ
