Azərbaycan hökuməti çalışır ki, vətəndaşların pensiya hüquqları indidən pozulmasın. Vətəndaşlar gələcəkdə onlara düşməli olan pensiyanı ala bilsinlər. Trend-in məlumatına görə, bunu Baş nazirin müavini Əli Əhmədov Sumqayıtda sahibkarlarla görüşdə deyib.
Ə.Əhmədov bildirib ki, sahibkarlarla görüşün məqsədi də ondan ibarətdir ki, müzakirələr aparıb bu vəziyyətin aradan qaldırılması üçün tədbirlər görülsün: “Əks halda, gələcəkdə vəziyyət belə olacaq. Siz bu gün işlədib sosial ödənişlərini ödəmədiyiniz insanları gələcəkdə dövlət sizin üzərinizə göndərəcək ki, vaxtında onların pensiya haqqını ödəməmisiniz. Onda bu şəxslər sizi məhkəməyə verəcək. Belə olan halda çox gərgin vəziyyət yaranacaq. Ona görə də dövlət çalışır ki, indidən bu problemlərin qarşısını alsın. Hökumətin istəyi və tələbi ondan ibarətdir ki, sahibkarlar çalışdırdığı insanların əmək hüquqlarını tam təmin etsinlər, həm bu günkü haqlarını, həm də gələcəkdə istifadə etməli olduqları pensiya hüquqlarını təmin etsinlər”.
"Bu gün Azərbaycan iqtisadiyyatının sürətli inkişafı göz qarşısındadır. Son 12 il ərzində iqtisadiyyatın 3.5 dəfə artması qürur duyulan bir haldır". Bunu da Baş nazirin müavini deyib.
Ə.Əhmədov bildirib ki, bütün bunların hamısı əsası ümummilli lider Heydər Əliyev tərəfindən qoyulmuş və bu gün Prezident İlham Əliyev tərəfindən uğurla həyata keçirilən siyasətin möhtəşəm uğurudur: “Azərbaycanda bütün sahələrin inkişafının kökündə iqtisadi inkişaf dayanr. İqtisadi inkişaf nəticəsində əldə olunan resurslar sayəsində Azərbaycanda əhalinin rifahı yaxşılaşıb, yoxsulluğun səviyyəsi 50 faizdən 5 faizə enib, əməkhaqları, pensiyalar 3 dəfə artıb, qəsəbələr, şəhərlər simasını dəyişib və müasirləşib. Bütün bunların hamısının kökündə iqtisadi inkişaf dayanır. İqtisadi inkişaf olmadan bütün bunlara nail olmaq mümkün olmazdı”.
Baş nazirin müavini vurğulayıb ki, bundan sonra nəzərdə tutulan işlərin həyata keçirilməsi yenə də iqtisadi inkişafla bağlıdır: “Ona görə də cənab Prezident İlham Əliyevin apardığı siyasətin hədəfində iqtisadi inkişaf dayanır. Bu gün Azərbaycanda iqtisadi sahədə köklü islahatlar nəzərdə tutulub. Bu günə qədər biz iqtisadi sahədə təbii resurslara istinad edirdik. Azərbaycan bu günə qədər təbii resurslardan səmərəli istifadə edib. Lakin bundan sonra da iqtisadiyyatın inkişafında yeni bir mərhələ başlayır. Yəni digər resurslar var, bu da iqtisadiyyatın diversifikasiyasına, tükənməyən resurslara əsaslanaraq iqtisadiyyatın, iqtisadi inkişafın yeni mərhələsi deməkdir. Bu, iş adamlarının məsuliyyətini, fəallıq əmsalının yüksəldilməsini tələb edir”.
