Ramil Osmanlı: "Tikilinin yarımçıq olması müştərinin də marağını azaldır"
Bu gün Bakıda yeni tikilən çoxmərtəbəli binalaran sayı kifayət qədərdir. Göz oxşayan bu binalar paytaxta estetik gözəllik verməklə yanaşı, sakinlərin ev probleminin həll olunmasında da mühüm rol oynayır. Ancaq onların aralarında şəhərin gözəlliyinə uyğun gəlməyən, mənzil təminatında rolu olmayan, ən əsası isə, təhlükələri ilə insanları daim gərginlikdə saxlayan yarımçıq tikililər də az deyil.
Bu gün paytaxtın müəyyən ərazilərində tikintisi yarımçıq qalan binalara rast gəlmək mümkündür. Bəziləri illərdir bu vəziyyətdə qalıb. Mütəxəssislər yarımçıq tikililərin hərraca çıxarılmasını məqbul sayır. Maraqlıdır, yarımçıq tikili binalar hərrac vasitəsilə satışa çıxarıla bilərmi?
Əmlak məsələləri üzrə ekspert Ramil Osmanlı bildirdi ki, yarımçıq tikili binaların sayı çox olmasa da, problem aktuallığını qoruyur: "Natamam tikili binaların məsələsi bir neçə dəfə müzakirəyə çıxarılıb. Hazırda dövlət bu cür problemli məsələni öz üzərinə götürməyə əlavə vəsait cəlb etməyi lazım bilmir. Amma bununla bağlı gələcəkdə zəruri addımlar atmaq olar. Çünki problem həddən artıq dərinləşib, hətta bir evin bir neçə nəfərə satılmasına oxşar bir vəziyyət alıb. Yüzlərlə istehlakçının hüquqları kobud şəkildə pozulub. Hətta burada cinayət tərkibi yaradan hallar da var. Bununla yanaşı, şəhərin estetik görünüşü, şəhərsalma mədəniyyətinə də xələl gətirən məqamları diqqətdən qaçırmamalıyıq. 2015-ci ilə olan məlumata görə, bu cür binaların sayı 200 civarında idi. Hesab edirəm ki, dövlət bu məsələyə müdaxilə etməlidir".
Ekspertin fikrincə, bu tikililərin hərraca çıxarılması problemin həlli yollarından biri olsa da, Azərbaycanda bu reallaşa bilməz: "Çünki bazarda olan sahibkarlar boş yer alıb özləri tikməyə üstünlük verir. Yarımçıq tikiliyə maraq göstərənlərin sayı azdır. Çünki yarımçıq tikili marketinq baxımından da sərfəli deyil. Tikilinin yarımçıq olması müştərinin də marağını azaldır, həmin ərazi problemli ərazi kimi diqqət çəkir. Bununla bağlı hərracın uğurlu nəticə verəcəyinə inanmıram".
Günel CƏLİLOVA
