Natiq Cəfərli: "Büdcədən maaş və ya təqaüd alan insanların gəliri indeksləşdi və bu da, formal olaraq, gəlir artımına səbəb oldu"
Açıqlanan rəsmi məlumatlara görə, əhalinin nominal gəlirləri 7,3 faiz artıb. Yanvar-may aylarında əhalinin nominal gəlirləri əvvəlki ilin eyni dövrünə nisbətən 7,3 faiz artaraq 18613,9 milyon manata çatıb, onun hər nəfərə düşən həcmi orta hesabla 1917,5 manat təşkil edib. Dövlət Statistika Komitəsinin məlumatına əsasən, bu dövr ərzində gəlirlərin 86,7 faizi son istehlak xərclərinə, 8,5 faizi vergilər, sosial sığorta və könüllü üzvlük haqlarının, 2,0 faizi kreditlər üzrə faizlərin ödənilməsinə sərf edilib, 2,8 faizi isə yığıma yönəldilib. Bütün icbari və könüllü ödənişlər edildikdən sonra əhalinin sərəncamında 17025,0 milyon manatlıq vəsait qalıb.
Əhalinin nominal gəlirlərinin nəyin hesabına artdığını öyrənmək məqsədilə ekspertə müraciət etdik.
İqtisadçı-ekspert Natiq Cəfərli "Bakı-Xəbər"ə açıqlamasında qeyd etdi ki, ilin əvvəlindən etibarən əhalinin gəlirlərində nominal artım qeydə alınıb: "Qanunvericiliyə uyğun olaraq, ilin əvvəlindən inflyasiya dərəcəsi qədər indeksləşmə oldu. Büdcədən maaş və ya təqaüd alan insanların gəliri indeksləşdi. Bu da, formal olaraq, gəlir artımına səbəb oldu. Ancaq bu, real gəlir artımı deyil. Çünki real gəlir artımı dünyada inflyasiyanı çıxmaq şərtilə hesablanır. Bu ilin ilk beş ayı ərzində rəsmi inflyasiya az qala 14 faizə yaxınlaşıb. Ərzaq inflyasiyası isə 18 faizə çatır. Belə olan halda 7 faizlik gəlir nominal gəlir artımı kimi qəbul olunmalıdır. Reallıqda isə vəziyyət əksinədir. Çünki insanların gəliri əvvəlki illərlə müqayisədə azalıb".
Günel CƏLİLOVA
