Qulu İsmayılov: "Azad iqtisadi zonalar, həmçinin, ehtiyatda olan məhsulların bir qisminin daxili bazara çıxarılmasına geniş imkan yaradacaq"
Türkiyə Naxçıvanla azad iqtisadi zona yaradır. Türkiyə KİV-inin verdiyi məlumata görə, bu barədə ölkənin iqtisadiyyat naziri Nihat Zeybekçi deyib. Onun sözlərinə görə, bu məsələ ilə bağlı artıq lazımi infrastruktur yaradılıb.
"Türkiyə İqtisadiyyat Nazirliyinin nümayəndələri artıq Naxçıvanda yerləşdirilib", - deyə nazir bildirib. Zeybekçi qeyd edib ki, Naxçıvanla aparılacaq ticarət Türkiyənin şəhərlərində aparılan ticarətdən fərqlənməyəcək. Əməliyyat zamanı türk lirəsindən istifadə ediləcək.
Belə bir azad iqtisadi zonanın yaradılması iqtisadiyyatımız üçün nə vəd edə bilər?
İqtisadçı Qulu İsmayılov qəzetimizə bildirdi ki, Azərbaycanda azad iqtisadi zonaların yaradılması prosesinə start verilib: "Ötən il Prezident İlham Əliyev Bakı şəhəri Qaradağ rayonunun Ələt qəsəbəsində yeni Bakı Beynəlxalq Dəniz Ticarət Limanının ərazisi daxil olmaqla azad ticarət zonası tipli xüsusi iqtisadi zonanın yaradılması ilə bağlı tədbirlər haqqında sərəncam imzalayıb.
Azad iqtisadi zonalar investisiyaların cəlb olunması və yeni iş yerlərinin açılması baxımından çox vacibdir. Ələtdə yaradılan azad iqtisadi zonanın özünəməxsus üstünlükləri olacaq. Belə addımların atılmasında investisiyaların cəlb olunması əsas hədəf olaraq nəzərdə tutulub. Belə bir iqtisadi zonanın yaradılmasının üstünlüyü ondan ibarətdir ki, Azərbaycan tranzit ölkə olaraq öz imkanlarını genişləndirə biləcək və ölkə ərazisində daha çox yükdaşımalara nail olacaq. Son dövrlər Azərbaycan ərazisindən malların Avropadan və Türkiyədən Asiyaya aparılmasına olan marağın artmasını nəzərə alaraq yeni iqtisadi zonanın yaradılması Azərbaycanın imkanlarını genişləndirəcək. Naxçıvan isə Azərbaycanın Türkiyə ilə sərhədi olan yeganə bölgəsidir. Muxtar Respublika, həmçinin, İranla həmsərhəddir. Bu da həmin bölgə üçün xarici ticarət dövriyyəsini artırmaq baxımından olduqca əlverişlidir.
Yeni iqtisadi zona, həmçinin, dövlət gəlirlərinin və büdcəyə daxil olan vəsaitin artmasına da səbəb olacaq. Qeyd edim ki, bu addım eləcə də məşğulluğun inkişafına müəyyən mənada yüksək təsir göstərəcək. Çünki investisiyaların cəlb olunması yeni iş yerlərinin yaranması deməkdir. Sözügedən zona digər sektorlarda aktivliyin artmasına münbit şərait yaratmış olacaq. İnvestisiyalar həyata keçirildikdən sonra yerli xammala ehtiyac yaranacaq. Bundan başqa, yeni iqtisadi zona imkan verəcək ki, iqtisadçı kadrların işlə təmin olunması həyata keçirilsin. Bu aspektdən yanaşsaq, bu çox mühüm məsələdir. Azad iqtisadi zonalar, həmçinin, ehtiyatda olan məhsulların bir qisminin daxili bazara çıxarılmasına geniş imkan yaradacaq. Bu da sözsüz ki, öz növbəsində, idxaldan asılılığın aradan qaldırılması və yerli məhsulun bazara çıxarılması baxımından çox vacibdir. Sözügedən zona ümumilikdə Azərbaycan iqtisadiyyatının inkişafına böyük müsbət təsir göstərəcək. Bu, dövlət gəlirlərinin artırılması baxımından çox vacibdir. Qeyd etmək lazımdır ki, iqtisadi zonaların yaradılması üçün spesifik potensiala ehtiyac yoxdur. Burada söhbət güzəştlərin tətbiq olunmasından gedir. İnfrastrukturumuz və mövcud şərait imkan verir ki, Azərbaycanda belə iqtisadi zonaların yaradılmasına başqa bölgələrdə də nail olunsun".
Məhəmmədəli QƏRİBLİ
