Rəşad Həsənov: "Banklararası kreditin qısamüddətli olduğunu nəzərə alsaq, banklar daha aşağı faizlə kredit təklif edir"
Manatla banklararası kreditlər ucuzlaşıb. Azərbaycanda manatla banklararası kreditlər cari ilin aprel ayında ucuzlaşmağa davam edib. Məlumat üçün qeyd edək ki, manatla kreditlər üzrə orta faiz apreldə 1,39 faiz bəndi azalaraq cari il mayın 1-nə 11,09 faiz təşkil edib. Bu barədə Azərbaycan Mərkəzi Bankının (AMB) aylıq hesabatına istinadən xəbər verilir.
Xarici valyutada verilən kreditlərdə isə orta faiz 9,45 faizdən 9,74 faizə yüksəlib.
Hesabata əsasən, ən bahalı banklararası kreditlər 30-90 günlük kreditlərdir. Belə ki, bu müddətə manatla verilən kreditlər üzrə orta faiz 20,62 faiz, xarici valyutada isə 17,19 faiz təşkil edib.
Manatla banklararası kreditlərin ucuzlaşması nə ilə bağlıdır? Məsələ ilə əlaqədar iqtisadçı-ekspert Rəşad Həsənova müraciət etdik. R.Həsənov "Bakı-Xəbər"ə açıqlamasında bunun təbii bir proses olduğunu qeyd etdi: "2017-ci il fevralın 2-dən etibarən manatın məzənnəsində sabitlik müşahidə olunur. Artıq 5 aya yaxındır ki, manatın məzənnəsi dəyişməz olaraq qalır. Manatın hazırkı vəziyyətində risq səviyyəsi isə artıq azalan istiqamət üzrədir. Risq qalmaqda davam edir, ancaq azalmağa doğru gedir. Banklararası kreditin qısamüddətli olduğunu nəzərə alsaq, banklar daha aşağı faizlə kredit təklif edir. Əvvəlki dövrlərdə isə vəziyyət əksinə idi. Çünki qısa müddət ərzində manatın məzənnəsi ilə bağlı risqin yüksək olması nəzərə alınaraq, faizlər yüksək şəkildə tətbiq olunurdu. Bu səbəbdən də həmin ərəfədə risq yüksək idi".
Həmsöhbətimizin sözlərinə görə, manatın məzənnəsində yaşanan sabitlik banklararası kreditin ucuzlaşmasına səbəb olub.
Günel CƏLİLOVA
