Pərviz Heydərov: "Sahibkarlara rahat və təhlükəsiz şərait yaradılarsa..."
Ukraynanın Poltava vilayətinin rəhbərliyi azərbaycanlı iş adamlarını sərmayə yatırmağa çağırıb. Belə ki, Azərbaycanın Ukraynadakı səfiri Azər Xudiyev bu ölkənin Poltava Vilayət Administrasiyasının rəhbəri Valeri Qolovko ilə görüşüb.
Görüş zamanı Azərbaycanın regionları ilə Poltava vilayəti arasında iqtisadi, elmi, mədəni əməkdaşlıq məsələləri geniş müzakirə olunub.
Vurğulanıb ki, Poltava vilayətinin rəhbərliyi azərbaycanlı iş adamlarının bu bölgəyə investisiya yatırmasında maraqlıdır. V.Qolovko qeyd edib ki, Poltava vilayəti neft və qaz yataqları ilə zəngindir. Bu baxımdan vilayət Azərbaycanın neft-qaz sahəsindəki təcrübəsindən yararlanmaq istəyir. Vilayət rəhbərliyi, həmçinin, SOCAR-ın yanacaqdoldurma məntəqələrinin bu bölgədə açılmasında maraqlı olduğunu bildirib.
Məsələ ilə bağlı fikir bildirən İqtisadiyyat Nazirliyi İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov "Bakı-Xəbər"ə açıqlamasında qeyd etdi ki, azərbaycanlı sahibkarların Ukraynanın hansısa vilayətinə yatırım etməsi maraqlı olar. Ancaq burada bəzi məqamlar var: "Bəllidir ki, bu gün Ukraynada çoxlu sayda azərbaycanlı var. Onların arasında iş adamları da az deyil. Bu gün Ukraynada yaşayan şəxslərin nə kimi çətinliklərlə qarşılaşması hər kəsə bəllidir. Bizim sahibkarlar həmin bölgəyə sərmayə yatırsa, bunun təhlükəsizliyinə necə təminat veriləcəyi sual altındadır. Sahibkarlara rahat və təhlükəsiz şərait yaradılarsa, təbii ki, bu gözəl təklifdir. Həmin bölgənin sərmayə gətirəcəyi də şübhəsizdir. Yenə deyirəm, təklif olaraq gözəldir".
Həmsöhbətimizin sözlərinə görə, Ukraynanın Poltava vilayəti nefti və qeyri-neft sektorunun inkişafı baxımından əhəmiyyətli zonadır.
Günel CƏLİLOVA
