Natiq Cəfərli: "Banklar verdikləri kreditin geri qaytarılmayacağına əmin olduqları üçün, kredit verilişi əvvəlki dönəmlərə nisbətən azalıb"
Xəbər verildiyi kimi, Azərbaycanda regionların kreditləşməsi azalıb. Azərbaycan Mərkəzi Bankının yaydığı məlumata əsasən, regionların kreditləşməsi illik müqayisədə 779,055 mln. manat və ya 25,72 % azalaraq cari il mayın 1-nə 2 249,96 mln. manat təşkil edib.
Həmçinin, cəmi kreditlərdə regionların xüsusi çəkisi də azalıb. Regionların payı illik 1,59 faiz bəndi azalaraq 2017-ci il mayın 1-nə 14,56 %-ə enib.
Hesabata əsasən, cari il mayın 1-nə əsasən, Azərbaycanda maliyyə və kredit təşkilatları tərəfindən verilən kreditlərin 13 203,552 mln. manatı və ya 85,44 %-i Bakı şəhərinin payına düşüb. Qeyd edək ki, ötən ilin müvafiq dövründə isə kreditləşmənin 15 729,667 mln. manatı və ya 83,85 %-i Bakı şəhərinin payına düşüb.
Regionlarda kreditləşmənin azalması nə ilə bağlıdır? Mövzu ilə əlaqədar ekspertə müraciət etdik. İqtisadçı-ekspert Natiq Cəfərli qeyd etdi ki, bölgələrdə kreditləşmənin zəifləməsi gözlənilən idi: "Əslində, risq menecmentinin aşağı olması bankların kredit verilişini zəiflədib. Banklar verdikləri kreditin geri qaytarılmayacağına əmin olduqları üçün, kredit verilişi əvvəlki dönəmlərə nisbətən azalıb. Banklar verdikləri krediti geri qaytara bilmir. Bəllidir ki, geri qayıtmayan kreditlərin həcmi günü-gündən artır".
Həmsöhbətimizin sözlərinə görə, regionlarda işlə bağlı problemlərin olması kredit sahəsinə də öz təsirini göstərir: "Regionlarda iqtisadi aktivlik azalıb. İqtisadi aktivliyin azalması kreditləşməyə təsir göstərir. Həmçinin, banklar regionlarda yerləşən daşınar və ya daşınmaz əmlakı zəmanət kimi girov olaraq götürmək istəmir. Çünki onların qiymətində azalmalar müşahidə olunur".
Günel CƏLİLOVA
