Ruslan Atakişiyev: "Bəzi sənaye sahələrinin inkişafında Böyük Britaniya şirkətləri yaxından iştirak edə bilər"
Bakıda Böyük Britaniya kraliçasının doğum günü ilə bağlı qəbul keçirilib. Bununla bağlı yayılan məlumata görə, qəbulda iki ölkə arasında diplomatik əlaqələrin 25 illiyi ilə əlaqədar slayd nümayiş etdirilib. Daha sonra çıxış edən Böyük Britaniyanın Azərbaycandakı səfiri Karol Krofts iki ölkə arasındakı əlaqələrin əhəmiyyətini qeyd edib.
Xarici işlər nazirinin müavini Mahmud Məmmədquliyev isə bildirib ki, Böyük Britaniya Azərbaycan üçün vacib tərəfdaşdır. Onun sözlərinə görə, enerji sahəsi əlaqələrin əsasını təşkil edir. Nazir müavini BP-nin Azərbaycandakı fəaliyyəti və "Cənub Qaz Dəhlizi" layihəsini qeyd edib: "Bu günə kimi Britaniya Azərbaycana 23 milyard dollar sərmayə yatırıb. Biz istərdik ki, bu əməkdaşlıq qeyri-neft sektorunda da olsun. Bu əlaqələrin inkişafında yeni yaradılmış hökumətlərarası komissiyanın işi çox vacibdir. Ümid edirəm ki bu komissiyanın işi əlaqələrin inkişafına daha da təkan verəcək".
Nazir müavini onu da qeyd edib ki, Britaniya ərazi bütövlüyü, beynəlxalq səviyyədə tanınmış sərhədlər prinsipinə və beynəlxalq hüququn digər normalarına riayət edir: "Belə bir mövqe Azərbaycan üçün də əhəmiyyət daşıyır".
Böyük Britaniya Avropada güclü iqtisadiyyata malik ölkələrdən biridir. Təbii ki, bu ölkədən Azərbaycanın qeyri-neft sektoruna sərmayələrin yatırılması iqtisadiyyatın dayanıqlı inkişafı baxımından müsbət əhəmiyyət kəsb edir. Maraqlıdır, Böyük Britaniya Azərbaycanda qeyri-neft sektorunun hansı sahələrinə sərmayə yatıra bilər? Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, Böyük Britaniya əsasən kənd təsərrüfatına sərmayə qoya bilər: "Azərbaycanla Böyük Britaniya arasında iqtisadi əlaqələri çoxşaxəli sahələri əhatə etməsi arzuolunandır. Ötən illər ərzində Böyük Britaniya şirkətləri əsasən neft sektoruna xeyli həcmdə investisiya yatırıb. Azərbaycana investisiyanın cəlbi ilə bağlı İqtisadiyyat Nazirliyi tərəfindən təkliflər də göndərilib. Belə götürəndə Azərbaycanda Böyük Britaniya üçün maraqlı ola biləcək çox sahələr var. Hesab edirəm ki, kənd təsərrüfatı sektoru Böyük Britaniya sərmayədarları üçün daha cəlbedicidir. Bu istiqamətdə müəyyən işlər gedir. O cümlədən, bəzi sənaye sahələrinin inkişafında Böyük Britaniya şirkətləri yaxından iştirak edə bilər. Bunların daha da dərinləşdirilməsinə və ikitərəfli görüşlərin keçirilməsinə ehtiyac var. İkitərəfli, qarşılıqlı biznes mübadiləsinin həyata keçirilməsi, biznes layihələrin dəyərləndirilməsi bu sahədə görülən işləri sürətləndirə bilər".
Vidadi ORDAHALLI
