Sahib Məmmədov: "Hələ qanunun parlamentdə müzakirəsi zamanı..."
Azərbaycanda fəaliyyət göstərən qeyri-hökumət təşkilatları Prezident İlham Əliyevə müraciət etməyə hazırlaşır. Buna səbəb Maliyyə Bazarlarına Nəzarət Palatasının 16 dekabr 2016-cı il tarixli "Nağdsız hesablaşmalar haqqında" Qanuna istinad edərək banklara ünvanladığı məktubun icrası nəticəsində yaranmış problemlərdir.
Bildirilir ki, banklar Maliyyə Bazarlarına Nəzarət Palatasının məktubuna istinad etməklə, qanunvericiliyə əsasən, qeyri-hökumət təşkilatlarına göstərməli olduqları bank xidmətlərinin əhatə dairəsini məhdudlaşdırıb. Nəticədə ölkədə dövlət tərəfindən maliyyələşdirilən yüzlərlə qeyri-hökumət təşkilatının ictimai əhəmiyyətli layihələrinin icrasında qeyri-müəyyənliklər meydana gəlib. Buna səbəb isə "Nağdsız hesablaşmalar haqqında" Qanunun 3.4.7-ci maddəsinə istinad edilərək dövlət donor qurumları tərəfindən ayrılmış vəsaitin rəsmiləşdirilməsini nəzərdə tutan qrant müqaviləsinin dövlət satınalma müqaviləsi kimi qiymətləndirilməsi olub.
Qeyd olunur ki, qeyri-hökumət təşkilatları 15 min manatadək məbləğ çərçivəsində nağd qaydada hesablaşmaların aparılmasını həyata keçirə bilmir. Hazırda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən keçirilən müsabiqə nəticələrinə əsasən, müxtəlif layihələrin icrası ilə bağlı ayrılmış maliyyə vəsaitləri qeyri-hökumət təşkilatlarının bank hesablarına köçürülsə də, bu vəsaitlərdən istifadə, praktiki olaraq, mümkünsüz hal alıb.
Bu səbəbdən QHT-lər ictimai əhəmiyyətli layihələrin həyata keçirilməsi ilə bağlı yaranmış çətinliyin aradan qaldırılması və qanunvericiliklə müəyyən edilmiş 15 min manatadək məbləğdə hesablaşmaların nağd qaydada aparılmasının təmin olunmasına dair dövlət başçısından müvafiq göstəriş verməsini xahiş etməyə hazırlaşır.
Görünən odur ki, bu, QHT-lər arasında böyük narahatlığa səbəb olub. Sözügedən məsələni dəyərləndirən Vətəndaşların Əmək Hüquqlarını Müdafiə Liqasının sədri, QHT-lərə Dövlət Dəstəyi Şurasının üzvü Sahib Məmmədovun fikrincə, bu qanun real şəraitə uyğun olmayaraq qəbul olunub: "Xidmət və satışla məşğul olan subyektlərin 80 faizindən çoxu nağdla işləyir. Yəni bank hesabları yoxdur. Palatadan banklara göndərilən məktub elə yazılıb ki, bank işçiləri, hüquqşünaslar onu oxuyub anlaya bilmir. Məktubda nə istənildiyi bilinmir, qanuna düzgün istinadlar yoxdur. Bu da əlavə çətinliklər yaradır. Nəzarət Palatası ictimaiyyətə heç bir açıqlama vermir, ümumiyyətlə, məsələyə etinasız yanaşırlar. Amma müvafiq dövlət orqanları, QHT-lər, fiziki şəxslər bu məsələdən narahatdır və əziyyət çəkir. Hələ qanunun parlamentdə müzakirəsi zamanı Həmkarlar İttifaqı Konfederasiyasının sədri Səttar Mehbalıyev də bunun neqativ nəticələri haqqında danışmışdı. QHT-lər, ümumiyyətlə, heç bir əməliyyat apara bilmir. Hətta qanunun qəbul olunmasından əvvəl ötənilki müqavilələr üzrə qalıq pulları bankdan çıxara bilmirlər. Xüsusən də regionlarda nağd əməliyyat aparmaq mümkün deyil".
Vidadi ORDAHALLI
