İlqar Hüseynli: "Tez-tez tikinti, istehsalat sahəsində qəzalar baş verir"
Azərbaycanda əmək mühafizəsi qaydalarının pozulmasına görə cəzalar sərtləşdirilir. Bununla bağlı bir sıra yeniliklərin tətbiqi nəzərdə tutulur. Cinayət Məcəlləsinə dəyişikliyin edilməsinə dair yeni layihəyə görə, texniki təhlükəsizlik və ya əmək mühafizəsinin başqa qaydalarına riayət edilməsi vəzifəsi həvalə edilmiş şəxs tərəfindən bu qaydaların pozulması nəticəsində ehtiyatsızlıqdan insan sağlamlığına ağır və ya az ağır zərər vurularsa, 2000 manatdan 3000 manatadək (hazırda 100 manatdan 500 manatadək) miqdarda cərimə ilə (və ya iki ilədək müddətə islah işləri və ya altı ayadək müddətə azadlıqdan məhrum etmə ilə) cəzalandırılır.
Məcəllədə bu hal ehtiyatsızlıqdan insan ölümünə səbəb olduqda azadlıqdan məhrum etmə üçün müəyyənləşdirilən maksimal müddət artırılıb. Belə ki, Məcəllənin hazırkı variantına görə, yuxarıda qeyd edilən əməl ehtiyatsızlıqdan insan ölümünə səbəb olduqda şəxs üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 5 ilədək müddətə azadlıqdan məhrum etmə ilə cəzalandırılır.
Yeni layihədə isə bu maddə qalmaq şərtilə yeni bənd də əlavə edilib. Bu əlavəyə görə, qeyd edilən hal ehtiyatsızlıqdan 2 və daha çox şəxsin ölümünə səbəb olduqda şəxs üç ilədək müddətə müəyyən vəzifə tutma və ya müəyyən fəaliyyətlə məşğul olma hüququndan məhrum edilməklə və ya edilməməklə 3 ildən 7 ilədək müddətə azadlıqdan məhrum etmə ilə cəzalandırılacaq.
O da məlumdur ki, Azərbaycanda istehsalat sahələrində bununla bağlı bir sıra problemlər var. Xüsusən də tikinti sektorunda pozuntulara daha çox yol verilir. Əvvəlki illərə baxanda müəyyən azalma olsa da, çox vaxt belə hadisələr gizlədilir. Ümumən əmək mühafizəsi qaydalarının pozulmasına görə cəzaların sərtləşdirilməsinə ekspertlərin münasibəti necədir?
Məsələyə münasibət bildirən ekspert İlqar Hüseynlinin sözlərinə görə, bu sahədə cəzaların sərtləşdirilməsi, qismən də olsa, problemin həllinə öz təsirini göstərəcək: "Cəzaların sərtləşdirilməsi, yeni qadağaların tətbiq olunması - bunların hamısı müəyyən mənada problemin həllinə köməklik göstərmiş olur. Müşahidələr göstərir ki, digər ölkələrdə belə, cəzalar sərtləşdirilməyəndə pozuntular çox olur. Cəzalar sərtləşdiriləndən sonra isə azalır. Fikrimcə, Azərbaycanda əmək mühafizəsi sahəsində belə cəzaların tətbiq olunması zəruridir. Ona görə ki, tez-tez tikinti, istehsalat sahəsində qəzalar baş verir. Belə hallar insanların həyatı bahasına baş verir. Bunun müqabilində cərimələrin az, cəzaların yüngül olması problemin həllinə gətirib çıxarmırdı. Sözügedən işlə məşğul olan sahibkarlar arasında bir arxayınçılıq vardı. Ancaq əməyin mühafizəsi ilə bağlı qaydaların sərtləşdirilməsi problemin həllinə, qismən də olsa, öz təsirini göstərəcək. Çox güman ki, bundan sonra sahibkarlar belə məsələlərə daha diqqətli yanaşacaq". Vidadi ORDAHALLI
