Vüqar Bayramov: "Valyuta risqlərinin olması banklararası kreditin bahalaşmasına səbəb olur"
Ruslan Atakişiyev: "Vəsaitlərin az olması bankların bir-birinə kredit verməsi prosesini də çətinləşdirir"
Azərbaycanda banklararası kreditlər cari ilin yanvar ayında bahalaşmaqda davam edib. Fevralın 1-nə manatla kreditlər üzrə orta faiz dərəcəsi illik 10,96 %, xarici valyuta ilə kreditlərdə isə 9,01 % təşkil edib. Bu barədə Azərbaycan Mərkəzi Bankının (AMB) aylıq hesabatında qeyd olunur.
Hesabata əsasən, manatla kreditlər aylıq 0,1 faiz bəndi, xarici valyutada isə 3,59 faiz bəndi bahalaşıb. Ən bahalı 30-90 günlük kreditlər olub. Manatla kreditlər üzrə orta faiz dərəcəsi illik 20,62 %, xarici valyutada isə 17,22 % təşkil edib.
Məlumat üçün bildirək ki, banklararası kreditlər müddətlərinə görə də qruplara ayrılır. Yəni 30 günədək olan kreditlər üzrə faiz dərəcəsi manatla 1.73 %, xarici valyuta ilə 4.30 % olub. Müqayisə aparsaq görərik ki, ötən il manatla verilən kreditlər üzrə faiz dərəcəsi 1.15 %, xarici valyuta ilə verilən kreditlər üzrə isə 2.82 % olub.
Banklararası kreditlərin bahalaşmasına münasibət bildirən iqtisadçı-ekspert Vüqar Bayramov "Bakı-Xəbər"ə açıqlamasında qeyd etdi ki, bu vəziyyət yanvar ayından etibarən müşahidə olunur: "Valyuta risqlərinin olması banklararası kreditin bahalaşmasına səbəb olur. Həmçinin, manatın məzənnəsinin möhkəmlənməsi vəziyyətə öz təsirini göstərir".
İqtisadçının fikrincə, mart ayının sonundan etibarən müəyyən qədər ucuzlaşmaların olması ehtimal olunur: "Mərkəzi Bankın son yığıncağından sonra da bəlli olur ki, növbəti mərhələdə də biz ucuzlaşmanı müşahidə edə biləcəyik".
İqtisadçı-ekspert Ruslan Atakişiyev "Bakı-Xəbər"ə açıqlamasında bildirdi ki, son zamanlar maliyyə bazarında risqlərin artması səbəbi ilə kreditlərin əldə olunması çətinləşib: "Həmçinin, əhalinin banklara yatırdığı əmanətlərin həcminin azalması bu sahəyə öz təsirini göstərir. Banklar digər mənbələrdən vəsait cəlb etməsi üçün müəyyən işlər görür. Vəsaitlərin az olması bankların bir-birinə kredit verməsi prosesini də çətinləşdirir. Belə olan halda, banklararası kredit bahalaşır".
Günel CƏLİLOVA
