"Cocuq Mərcanlıda işığın yanması o deməkdir ki..."
"Azərişıq" ASC cəbhə bölgələrində yenidənqurma, əsaslı təmir-tikinti və bərpa işləri həyata keçirir. Qurumun mətbuat xidmətinin yaydığı xəbərə görə, düşmənlə təmas xəttində yerləşən Tapqaraqoyunlu kəndi ərazisində elektrik enerjisinin verilişinin fasiləsiz təşkili məqsədilə həmin kəndi enerji ilə qidalandıran Əzizbəyov hava xətlərində 830 ədəd 6 kV izolyator yeni 10 kV izolyatorla dəyişdirilib.
10 kV II Subartezian hava xəttində isə 16 ədəd yararsız ağac dayaq dəmir-beton dayaqlarla əvəz olunub. 0,4 kV şəbəkədə aprel döyüşləri zamanı zədələnmiş naqillər dəyişdirilib, 9 ədəd 10/0,4 komplekt transformator məntəqəsində (KTM) təmir işləri aparılıb.
Füzuli rayonunda 10 ədəd yarımstansiyada, 728 ədəd KTM-də yerli elektrik şəbəkə tərəfindən cari və profilaktik tədbirlər həyata keçirilib. Bundan başqa, ərazidə 361 ədəd dayaq, 42000 metr naqil, 130 ədəd izolyator dəyişdirilib. Yeni SİP kabellərinin çəkilməsi enerji itkisinin qarşısını xeyli alıb. "Azərişıq" ASC tərəfindən Füzuli rayonunda 18 ədəd transformator məntəqəsi quraşdırılıb.
Həmçinin Ağdam, Tərtər, Naftalan, Qazax və Tovuz rayonlarında da analoji işlər görülüb.
Cəbrayıl rayonunun aprel döyüşlərində azad edilmiş torpaqlarının və ətraf ərazilərin, həmçinin, hərbi obyektlərin fasiləsiz, keyfiyyətli elektrik enerjisi ilə təmin edilməsi məqsədilə Cocuq Mərcanlı yarımstansiyasının tikilməsi planlaşdırılır.
Bununla yanaşı, Cəbrayıl rayonu ərazisində yerləşən və ötən ilin aprel döyüşlərində azad edilən "Lələtəpə" yüksəkliyinə hava xətlərinin çəkilməsi üçün prosesə başlanıb. Artıq çətin və təhlükəli şərait olmasına baxmayaraq, yüksəklikdə elektrik dayaqları basdırılıb və yaxın müddətdə hava xətlərinin məftilləri də çəkiləcək.
Aprel döyüşlərində düşmən tapdağından azad olunan "Lələtəpə" yüksəkliyində yenidənqurma işləri aparılır. İşğaldan azad olunan ərazilər yaxın müddət ərzində işıqla tam təmin olunacaq.
Millət vəkili Musa Quliyev "Bakı-Xəbər"ə açıqlamasında qeyd etdi ki, işğaldan azad olunan ərazilərdə yenidənqurma işlərinin aparılması təbii haldır: "Bəllidir ki, ermənilər həmin bölgəni işğal edərkən oranın bütün sosial infrastrukturunu darmadağın etmişlər. Ancaq artıq Cocuq Mərcanlı geri alındığına görə orada sosial həyatın bərpa olunması üçün ölkə başçısı tərəfindən sərəncam imzalanıb. Həmin sərəncama əsasən, adıçəkilən bölgədə yaşayışın təmini üçün sosial infrastruktur yenidən təmin olunmalıdır. Bunun üçün ilk olaraq işğaldan azad olunan bölgələrə işıq xətti çəkilir. Cocuq Mərcanlıda yarımstansiyanın inşa olunması Qarabağda həyatın yenidən oyanması deməkdir. Təbii ki, "Lələtəpə" yüksəkliyinə işıq çəkilməsi erməniləri təşvişə salacaq.
Cocuq Mərcanlıda işığın yanması o deməkdir ki, yaxın müddət ərzində işğalda olan digər kəndlərimizdə də zəfər işıqları yanacaq".
Günel CƏLİLOVA
