Oqtay Haqverdiyev: "Nəticədə minlərlə şəxs işlə təmin olunacaq"
"İndiyə qədər bölgələrdə məcburi köçkünlər üçün 100-ə yaxın müasir yaşayış kompleksi salınıb, 250 min köçkün yeni mənzillə təmin olunub, salınan qəsəbələrdə 150 məktəb, 60 tibb mərkəzi və uşaq bağçası inşa edilib. Soydaşlarımızın işlə təmin olunması istiqamətində lazımi addımlar atılıb, son 13 ildə yüz minlərlə qaçqın və məcburi köçkün işlə təmin olunub".
Bunu Bakı və Sumqayıt şəhərlərinin yataqxanalarında müvəqqəti məskunlaşmış qaçqın və məcburi köçkün ailələrinin köçürülməsinə həsr olunmuş müşavirədə Azərbaycanın Birinci vitse-prezidenti Mehriban Əliyeva deyib.
Birinci vitse-prezident, buna baxmayaraq, hələ də bir çox məcburi köçkün ailələrinin qəzalı və yararsız binalarda yaşadığını, onların həyat şəraitinin yaxşılaşdırılması ilə bağlı işlərin sürətləndirilməsi üçün əlavə addımların atılmasına ehtiyacın olduğunu bildirib.
Azərbaycanın Birinci vitse-prezidenti Bakı və Sumqayıt şəhərlərindəki qaçqın və məcburi köçkünlərin yeni mənzillərə köçürülməsinin vacibliyini vurğulayıb, bu məqsədlə əlavə vəsaitin və yeni binaların inşası üçün ərazinin ayrılmasının və tezliklə tikinti işlərinə başlanmasının zəruriliyini qeyd edib. Onu da bildirib ki, Bakı və Sumqayıtda inşa olunan yeni binalarda qaçqın və məcburi köçkünlərin köçürülməsi üçün mənzillər ayrılmalıdır: "Bu gün qarşımızda duran əsas məqsəd Bakı və Sumqayıt şəhərlərindəki 4 min köçkün ailəsini yeni mənzillərlə təmin etməkdir. Ən qəzalı, ən ağır vəziyyətdə yaşayan ailələr tezliklə yeni binalara köçürülməlidir".
Ümumilikdə, sözügedən layihənin həyata keçirilməsi məcburi köçkünlərin mənzil təminatının yaxşılaşmasına və tikinti sektorunda durğunluğun aradan qaldırılmasına necə təsir göstərəcək? Məsələyə münasibət bildirən iqtisadçı-ekspert Oqtay Haqverdiyevin sözlərinə görə, bu, hər iki sahəyə müsbət təsir göstərəcək: "Mehriban xanımın bu təşəbbüsü həm məcburi köçkünlərin mənzil təminatını yaxşılaşdıracaq, həm də tikinti sahəsində durğunluğu aradan qaldıracaq. Ümumilikdə, qaçqın və məcburi köçkünlərin mənzillə təmin olunması sahəsində neçə illərdir iş gedir. Hesab edirəm ki, bundan sonra sözügedən sahədə işlər daha effektiv təşkil olunacaq. Çünki yüzminlərlə məcburi köçkün var ki, onlar mənzillə təmin olunmalıdır, xüsusən də yataxanalarda çətin vəziyyətdə yaşayan məcburi köçkünlər. Ona görə də bu təşəbbüsü alqışlayıram. Görülən işlər, istər-istəməz, tikinti sektorunda aktivliyi artıracaq. Nəticədə minlərlə şəxs işlə təmin olunacaq. Çünki tikinti sektoru əməktutumludur". Vidadi ORDAHALLI
