Rəşad Həsənli: "Milli valyutanın məzənnəsi xarici ilə müqayisədə fərqli olduğu üçün vətəndaşlar həmin kartlardan istifadədə zərərə uğrayır"
Dövriyyədə olan kredit kartlarının sayı günü-gündən azalır. Bildirilir ki, bu ilin avqustunda Azərbaycanda kredit kartları ilə ölkə daxilində 188 mln. manat həcmində 946 min əməliyyat həyata keçirilib. Mərkəzi Bankın yaydığı məlumata əsasən, aylıq müqayisədə əməliyyatların həcmində 40 mln. manat və ya 27 %, əməliyyatların sayında isə 93 min və ya 11 % artım olub.
Ötən ilin eyni dövrü ilə müqayisədə isə həm əməliyyatların sayında, həm də həcmində azalma qeydə alınıb. Əməliyyatların həcmi ötən ilin eyni ayı ilə müqayisədə 16 mln. manat və ya 7,8 %, sayı isə 594 min və ya 38,6 % azalıb.
Azərbaycanda dövriyyədə olan kredit kartlarının sayı avqustda 16 min və ya 2,2 % azalaraq 2016-cı il sentyabrın 1-nə 728 min ədədə enib. İlin əvvəli ilə müqayisədə kredit kartlarının sayında 282 min ədəd və ya 28 %, illik müqayisədə isə 433 min ədəd və ya 37 % azalma qeydə alınıb.
Dövriyyədə olan kredit kartlarının sayının azalması barədə fikir bildirən iqtisadçı-ekspert Rəşad Həsənli "Bakı-Xəbər"ə açıqlamasında qeyd etdi ki, bu proses 2014-cü ilin sonlarından müşahidə olunur: "Kredit kartlarından imtinanın səbəblərindən biri bəzi müştərilərin adının banklarda problemli müştəri olaraq qeydiyyata alınmasıdır. Kredit ödənişlərinin vaxtında qaytarılmamasına görə onlar banklar tərəfindən problemli müştəri kimi qəbul olunur. Həmin müştərinin kredit kartı var idisə, onların kartdan istifadəsi məhdudlaşdırılır. Səbəb isə aylıq ödənişi etməməsidir".
Həmsöhbətimizin sözlərinə görə, kredit kartlarından istifadənin məhdudlaşdırılmasının digər səbəbi isə müştərilərin təklif olunan xarici valyuta vəsaitilə həmin vasitədən istifadədə maraqlı olmamasıdır. Bəllidir ki, milli valyutanın məzənnəsi xarici ilə müqayisədə fərqli olduğu üçün vətəndaşlar həmin kartlardan istifadədə zərərə uğrayır: "Manatla kredit kartlarının təklifində isə bankların özü maraqlı deyil. Bu səbəbdən də bir çox banklar aktiv olmuş kredit kartlarının müddəti başa çatdıqdan sonra onun yenidən aktivləşdirilməsini həyata keçirmir.
Digər səbəblər də var. Belə ki, müəyyən sahələrdə iş yerlərinin azalması müştəri kontingentinin daralmasına səbəb olur. O da bəllidir ki, bu ilin may ayından etibarən Maliyyə Bazarlarına Nəzarət Palatası ölkədə istehlak kreditləri ilə bağlı şərtlərə dəyişiklik edib. Banklar istehlak kreditlərini yeni şərtlərlə vermək məcburiyyətindədir. Yeni şərtlər isə kredit üçün müraciət edən vətəndaşa "hə" cavabını əngəlləyir. Bir çox hallarda kredit üçün müraciət edən vətəndaşların maddi durumu tələb olunan maliyyə şərtlərinə uyğun deyil".
İqtisadçı onu da əlavə etdi ki, ötən illə müqayisədə ölkədə 10-a yaxın bank bağlanıb. Həmin banklar bağlandığına görə onların kredit kartları da deaktiv olub.
Günel CƏLİLOVA
