Fikrət Yusifov: “Adam belə yanaşma ilə Naxçıvanı necə inkişaf etdirməyi düşünürdü, bu aydın deyil”
Prezident İlham Əliyev yerli telekanallara müsahibəsində deyib ki, Qarabağda və Şərqi Zəngəzurda gedən quruculuq işlərinə paralel olaraq Naxçıvan Muxtar Respublikasında da istər yaşıl enerji olsun, istər kənd təsərrüfatı, istər suvarma, - indi orada böyük suvarma layihələri icra ediləcək, - istər turizm, bu bölgəni biz birləşdirəcəyik. Mən bunu bir daha demək istəyirəm, biz bunu onsuz da edəcəkdik, amma yaxşı ki, bunu sülh yolu ilə edirik.
Qarabağ və Şərqi Zəngəzurda həyata keçirilən layihələrin Naxçıvanda da uğurla reallaşdırılması üçün ora yeni təyin olunan nümayəndənin üzərinə hansı vəzifələr düşür? Bununla bağlı hansı məqamlara xüsusi diqqət edilməlidir?
Sözügedən məsələni baki-xeber.com-a şərh edən sabiq maliyyə naziri, professor Fikrət Yusifovun fikrincə, Azərbaycan öz ərazisində Zəngəzur dəhlizinin normal fəaliyyətini təmin edəcək bütün işləri demək olar ki, tamamlayıb: “İndi bu işlərin Naxçıvanda sürətlə getməsi gözləniləndir. Orta Yolun mühüm hissəsinin Naxçıvan üzərindən keçməsi MR-də bir çox işlərin görülməsini zəruri edir. Təəssüflər olsun ki, Naxçıvana bundan öncə təyin edilmiş nümayəndənin bacaqsızlığı üzündən son bir neçə ildə demək olar heç bir quruculuq işi aparılmadı. Biz görmüşdük ki, bölgələr mərkəzdən daha çox vəsait almaq üçün bir qayda olaraq “dəridən-qabıqdan” çıxırlar. Lakin Naxçıvanın keçmiş nümayəndəsinin maymaqlığı üzündən Prezidentin Naxçıvanın sosial-iqtisadi inkişafına 2024-cü il üçün ayırdığı vəsaitdən cəmisi 1 milyon manat istifadə edildi. Adam belə yanaşma ilə Naxçıvanı necə inkişaf etdirməyi düşünürdü, bu aydın deyil. Görünən bu idi ki, o bu haqda heç düşünmək belə istəmirdi. Əldə etdiyim məlumatlara görə, Naxçıvana yeni təyin olunmuş nümayəndə yetərincə bacarıqlı və ağıllı bir rəhbərdir. Onun təyinat alan kimi Naxçıvanda öncəki nümayəndənin yaratdığı əxlaqsızlıq yuvalarını qapatması alqışa layiqdir. Az müddət ərzində yeni rəhbərin gördüyü işlər onu deməyə əsas verir ki, dövlət başçısının Naxçıvanın yeni rəhbəri qarşısında qoyduğu vəzifələr uğurla icra olunacaq. Orta Yolun Naxçıvandan keçən hissəsi isə tez bir zamanda bərpa ediləcək. Bu yolun Naxçıvana verə biləcəyi iqtisadi dvidentlər yetərincə böyükdür. İnanıram ki, MR-in yeni rəhbərliyi otuz ildən çox blokada şəraitində yaşamış Naxçıvanın sürətli inkişafını təmin etmək üçün Orta Yolun yaratdığı şansdan uğurla yararlanacaq”.
Vidadi ORDAHALLI
