Məlum olduğu kimi, "İcbari sığortalar haqqında" qanuna dəyişiklik olunub. Dəyişikliyə əsasən, Azərbaycanda daşınmaz əmlakın icbari sığortası elektron qaydada həyata keçiriləcək.
Bu yenilik daşınmaz əmlakın sığortasına nəzarəti asanlaşdıracaq. Eyni zamanda elektron sistem sığortası olmayan əmlak sahiblərinin müəyyən edilməsinə imkan verəcək. Sığortası olmayan mənzil və obyekt sahibləri isə cərimə olunacaqlar. Belə ki, iyunun 1-dən işə düşəcək sistem həm əmlakın sığortalanması prosesini sadələşdirəcək, həm də əmlakın sığortalı olub-olmamasına nəzarət imkanı yaradacaq.
Qeyd etdiyimiz kimi, əmlakını sığorta etdirməyənlər iyunun 1-dən etibarən cərimələnəcək. Məlumata görə, daşınmaz əmlakın icbari sığortası ilə bağlı vətəndaşlara xəbərdarlıq edilməyə başlanılıb. Bu məqsədlə mənzillərə bildirişlər göndərilir. Qeyd edilir ki, fiziki şəxslərə 30 manat, vəzifəli şəxslərə 80 manat, hüquqi şəxslərə isə 200 manat cərimə tətbiq ediləcək.
Məlumat üçün qeyd edək ki, mənzillərin icbari sığorta məbləği Bakı şəhəri üzrə 50 AZN, Gəncə, Sumqayıt və Naxçıvanda 40 AZN, digər rayonlarda isə 30 AZN-dir.
Elnur Fərzəliyev: “İndiyədək Azərbaycanda daşınmaz əmlakın sığortası könüllülük prinsipi əsasında idi, ancaq indi…”
Məsələ iilə bağlı fikir bildirən əmlak məsələləri üzrə Elnur Fərzəliyev qeyd etdi ki, çıxarışsız (kupçasız) evlər sığortalanmayacaq: “Əmlakın sığortalanması vətəndaşların birbaşa olaraq özlərinə xidmət etməsi deməkdir. Ev sığortalıdırsa, ona dəymiş zərər müvafiq qurumlar tərəfindən qarşılanır.Yaşayış mənzilinin həcmindən asılı olmayaraq minimal icbari sığorta haqqı 50 manat nəzərdə tutulub. Bu məbləğ əmlak sahibi tərəfindən ildə bir dəfə olmaqla ödənilməlidir. Lakin vətəndaşlar bu məbləği ödəməkdən boyun qaçırırlar. Vətəndaş külli miqdarda pul xərcləyib ev ala bilir, amma 50 manat ödəyib əmlaklarını sığortalamaq istəmir. İnsanlar anlamalıdırlar ki, həmin minimal sığorta haqqını ödəməklə evlərini 25 min manatadək dəymiş zərərdən qoruya bilərlər”.
Ekspertin sözlərinə görə, indiyədək Azərbaycanda daşınmaz əmlakın sığortası könüllülük prinsipi əsasında idi. Yalnız hər hansı əmlak alqı-satqısı zamanı çıxarışlı əmlaklar icbari sığorta ilə sığortalanırdı. Ya da əmlak ipoteka və digər kredit şərtləri ilə satılılırsa, o zaman bankın tələbi ilə mütləq şəkildə sığortalanmalı idi. Ancaq indi vəziyyət dəyişir.
Xalid Kərimli: “Daşınmaz əmlakını vaxtında sığorta etməyən şəxslər üçün cərimələr nəzərdə tutulub”
İqtisadçı ekspert Xalid Kərimli bildirdi ki, vətəndaşların əmlakının icbari sığortası barədə qanunvericilik 2021-ci ildə qəbul olunub.: “2018-ci ildə isə bununla bağlı prezident İlham Əliyev tərəfindən fərman imzalanıb. Bu qanunvericilik əmlakın icbari sığortalanmasını özündə ehtiva edir. Vətəndaş öz əmlakını sığortalamağa məcburdur. Bu da onu göstərir ki, mənzilini sığorta etməyən şəxslər cərimələnəcək. Daşınmaz əmlakını vaxtında sığorta etməyən şəxslər üçün cərimələr nəzərdə tutulub. Bu işlər vaxtında və düzgün təşkil edilərsə, icbari sığorta və cərimələnmə prosesləri düzgün aparılarsa, baş verən hadisədən dərhal sonra düzgün qiymətləndirilmə aparılarsa və sığortalanma dəqiq həyata kecirilərsə, vətəndaşlar da bu məsələyə ciddi yanaşacaqlar”
Günel CƏLİLOVA
