Bir neçə il bundan əvvəl - 2018-ci ilin sonları, 2019-cu ilin əvvəllərində ölkəmizdə yaşanan kredit ajiotajı ilə bağlı kədərli təəssüratlar hələ yaddaşlardan silinməyib. Həmin dövrdə Azərbaycan dövləti çətinliklərlə üzləşən, banklarla çəkişmələrdə qalan vətəndaşlarını tək buraxmadı.
Dövlət başçısının imzaladığı müvafiq Fərmanla 800 mindən çox insanın yaranmış kredit problemi aradan qaldırıldı. Bunun üçün dövlət tərəfindən 700 milyon manatdan çox vəsait ödənildi. Bütövlükdə, problemli kreditlərin həlli Azərbaycan hakimiyyətinin ciddi sosial təşəbbüsü kimi səciyyələndirilir.
Bu yaşananlardan sonra əlaqədar qurumların bir daha kreditlərlə bağlı problemin yaranmasına imkan verməyəcəkləri gözlənilirdi. Ancaq gözləntilər özünü doğrultmadı. Belə ki, son zamanlar banklar tərəfindən yüksək məbləğdə kreditin verilməsi ilə bağlı istehlakçılara sms və ya zənglər gəlir. Kiminə maaş, kiminə isə pensiyası qarşılığında kreditlər təklif olunur.
Onu da qeyd edək ki, bu gün banklar tərəfindən vətəndaşlara göndərilən yalançı sms-lər ciddi narazılığa səbəb olan məsələlərdən biridir. Banklar vətəndaşlara böyük məbləğdə, 20 min, 30 min məbləğində kredit təklifini əks etdirən sms-lər göndərir, lakin vətəndaş müraciət edərkən bəlli olur ki, vətəndaşın bu krediti götürmək imkanı yoxdur. Əgər elədirsə, banklar niyə vətəndaşları narahat edib narazı salır?
“İstər banklar, istərsə də maliyyə xidmətləri göstərən digər qurumlar vətəndaşa onun ödəmə qabiliyyətinə və ya ala biləcəyi kredit məbləğinə uyğun məlumat göndərməlidir”
Millət vəkili Vüqar Bayramov bildirdi ki, istehlakçılara yanlış məlumatın verilməsi qanunla qadağandır: “Bu, "İstehlakçıların hüquqlarının müdafiəsi haqqında” qanuna da ziddir. İstər banklar, istərsə də maliyyə xidmətləri göstərən digər qurumlar vətəndaşa onun ödəmə qabiliyyətinə və ya ala biləcəyi kredit məbləğinə uyğun olaraq məlumat göndərməlidir. Misal üçün, kimlər hansı şərtlər daxilində hansı məbləğdə kredit ala bilər. Yəni vətəndaşa ümumi məlumatların göndərilməsi qanunaziddir. Çünki vətəndaş zaman sərf edir, banka gedir, amma sonradan bəlli olur ki, vətəndaşın həmin məbləğdə kredit almaq hüququ yoxdur.
Bu kimi problemlərin həll edilməsi üçün Mərkəzi Bank tərəfindən xüsusi qaydaların müəyyənləşdirilməsi məqsədəuyğun olardı. Çünki nəticə etibarı ilə bankların göndərdiyi sms-lər və ya kreditlə bağlı dəvətlər vətəndaşların hüquqlarının pozulmasına gətirib çıxarmamalıdır”.
Günel CƏLİLOVA
