Məlum olduğu kimi, İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin təşəbbüsü ilə “AccessBank” QSC ilə reklamlarındakı “haqsız” davranışa görə iş qaldırılıb. “Haqsız rəqabət haqqında” Azərbaycan Respublikası Qanununun 9-cu maddəsinin üçüncü abzasının tələblərinin pozulması əlamətləri aşkar edilib. Belə ki, reklam bazarına dövlət nəzarəti məqsədilə aparılmış monitorinqlər zamanı “AccessBank” QSC tərəfindən verilən reklamlarda haqsız rəqabət halları aşkar edilib.
Həmçinin, bank krediti ödəyə bilməyən sahibkarlara qarşı cinayət işi açır. Maraqlıdır, bank krediti ödəyə bilməyən şəxsə cinayət işi aça bilərmi? Bu nə dərəcədə düzgündür?
“AccessBank” kredit götürən, lakin geri qaytara bilməyən sahibkarlara cinayət işi açıb, bu hal qeydə alınıb”
Mövzu ilə bağlı fikir bildirən bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, reklamlarındakı “haqsız” davranış qaydaları əksər banklarda müşahidə olunur: “Bir bank bazarda önə keçmək, digərlərini geridə qoymaq və gözdən salmaq üçün müəyyən yollara əl atır, hansısa qanunsuz yolla istehlakçıların gözündə üstünlük qazanmağa çalışır. Sağlam bazar şəraitində rəqabət olmalıdır”.
Ə.Həsənov onu da əlavə etdi ki, “AccessBank”ın kreditini qaytara bilməyən sahibkarlara cinayət işi açmasının şahidi olub: “Bu banka qarşı mən bir neçə iş aparmışam. Bir işdə hətta bəraətin verilməsinə də nail olmuşam. Sübut etmişəm ki, həmin sahibkarın günahı yoxdur. Məhkəmə də ona bəraət verib. Bu da haqsız rəqabət formalarından biridir. Problemli kreditlər çox yerdə ola bilər. Ancaq bunu məhkəmə yolu ilə həll etmək mümkündür. “AccessBank” isə bura hüquq-mühafizə orqanlarını da qatmağa çalışır ki, vətəndaşı qorxutsun, məsələni öz xeyrinə həll etsin”.
Ekspert bildirdi ki, kreditin qaytarılmamasına görə heç kəs cinayət məsuliyyətinə cəlb edilə bilməz: “Yalnız kreditin qaytarılması haqda qüvvəyə minmiş məhkəmə aktını qərəzli icra etməyən (yəni sübut edilmiş imkan ola-ola borcu ödəməyən) kəs məsuliyyət daşıyır (imkan yoxdursa, həmin şəxs özünü müflis elan edə bilər).
Günel CƏLİLOVA
