“Bu ilin 3 ayında əldə edilmiş nailiyyətlər imkan verir ki, biz büdcəyə əlavələr edək”. Bu barədə Prezident İlham Əliyev Salyan rayonunda Azərbaycan Televiziyasına müsahibəsində bildirib.
Ölkə başçısının fikrincə, büdcə dürüstləşməsinin aparılması və bunun Milli Məclisə təqdim edilməsi ilə bağlı hökumətə göstəriş verilib: “İlk növbədə Vergi Xidməti xətti ilə üç ay ərzində proqnozdan 1,1 milyard manat çox vəsait toplanmışdır. Bu da şəffaflıq nəticəsində olmuşdur, yeni idarəetmə nəticəsində olmuşdur. Gömrük sektorunda isə proqnozdan əlavə toplanan vəsait 400 milyon manatdan çoxdur. Hazırda gömrük sahəsində də aparılan islahatlar, əvvəlki dövrlərdə buraxılan nöqsanların aradan qaldırılması prosesi uğurla gedir. Təkcə 3 ay ərzində proqnozdan əlavə 1,5 milyard manat vəsait yığılıbdır. Əlbəttə ki, biz ilin ancaq üç ayını başa vurmuşuq, ilin sonuna qədər, təbii ki, bu rəqəm artacaq. Ona görə işləri sürətləndirmək və ölkə qarşısında duran digər vəzifələri yerinə yetirmək üçün, hesab edirəm ki, büdcə dürüstləşməsi aparılmalıdır”.
Görünən odur ki, vəsaitlər artır. Maraqlıdır, mövcud büdcə hansı istiqamətdə dəyişəcək?
“İşğaldan azad olunan ərazilərin bərpasına və yenidən qurulmasına daha çox vəsaitin ayrılacağı gözlənilir”
Sözügedən məsələyə aydınlıq gətirən iqtisadçı-ekspert Fuad İbrahimovun fikrincə, iki istiqamətdə büdcəyə əlavələrin ediləcəyi gözlənilir: “Əvvəla, proqnozdan artıq vəsaitlər daxil olursa, bu, ilk növbədə onun göstəricisidir ki, Azərbaycanın gizli iqtisadiyyatdan çıxışı genişlənir, şaxələnir. Kölgə iqtisadiyyatının miqyası məhdudlaşdırılır. Dövlət orqanlarında neqativ halların azalması, sahibkarlarla bu orqanlar arasında sağlam mühitin formalaşması şəffaflığın yaranmasına gətirib çıxarır. Bu çox mühüm göstəricidir. O baxımdan ki, iqtisadi artıma müsbət təsir edir. Bütün bunların fonunda daxilolmalar artırsa, əlbəttə ki, bu, büdcəyə əlavələrin olunmasına imkan yaradacaq. Bununla bağlı istiqamətlər genişdir. İlk növbədə əhalinin sosial rifahına müsbət təsir edən sahələrə əlavə vəsait ayrılacaq. Artımlar fonunda ilin ortasında büdcəyə əlavələr ediləcəksə, ilk növbədə sosial artımlara gediləcək. Çox güman ki, pensiya və sosial müavinətlər yenidən artırıla bilər. İkinci istiqamət, işğaldan azad olunan ərazilərin bərpasına və yenidən qurulmasına daha çox vəsaitin ayrılacağı gözlənilir. Xüsusən bu istiqamətdə daha çox vəsaitlərin ayrılacağı istisna olunmur. Ona görə də iki istiqamət bizim üçün prioritetdir. Birincisi, əhalinin sosial rifahı. İkincisi isə, azad olunan ərazilərin bərpası və iqtisadi dövriyyəyə cəlb olunması. Söhbət ondan gedir ki, azad olunan ərazilər iqtisadi dövriyyəyə cəlb olunsa, bu, iqtisadi artıma ciddi təkan verəcək. Oradan gələn gəlirlər gələcəkdə həm sosial rifahın artırılmasına xərclənəcək, həm də iqtisadiyyatımızın dayanıqlı inkişafına təkan verəcək. Ona görə də bu yöndə görülən və görüləcək işlər mühüm əhəmiyyət kəsb edir”.
Vidadi ORDAHALLI
