Mərkəzi Bank ötən il boyunca xarici ölkələrdən Azərbaycana göndərilən pul köçürmələrinə dair göstəricilərini açıqlayıb. Açıqlanan göstəricilərdən bəlli olur ki, 2022-ci ildə Azərbaycanda pul köçürmələrində rekord qeydə alınıb. Ötən il xarici ölkələrdən Azərbaycana 3 milyard 620 milyon dollar köçürülüb.
Mərkəzi Bankın açıqladığı rəqəmlərdən aydın olur ki, xaricdən göndərilən pulların həcmindəki bu kəskin artım, əsasən, Rusiyadan qaynaqlanır. Rəsmi rəqəmlərə görə, ötən il Rusiyadan Azərbaycana 2 milyard 969 milyon dollar köçürülüb.
Azərbaycana göndərilən pul köçürmələrinin həcminə görə Rusiyadan sonra ikinci yeri ABŞ tutur. Ötən il ABŞ-dan Azərbaycana pulköçürmə sistemləri ilə 155 milyon dollar göndərilib. ABŞ-dan gələn köçürmələrdə diqqətçəkən məqam son illər bu istiqamətdə də ciddi artımların baş verməsidir. Məsələn, 2021-ci ildə ABŞ-dan Azərbaycana 72 milyon dollar, 2020-ci ildə 53 milyon dollar, 2019-cu ildə 40 milyon dollar göndərilmişdi. Bu o deməkdir ki, son üç ildə ABŞ-dan Azərbaycana pul köçürmələrinin həcmi təxminən dörd dəfə artıb.
Maraqlıdır, ABŞ-dan ölkəmizə pul köçürmələrinin artmasının əsas səbəbi nədir?
“Azərbaycanın Amerika ilə ticarət əlaqələri var, şirkətlərarası münasibətlərin inkişaf etməsi ölkəyə göndərilən pulun həcminə təsir edir”
İqtisadçı ekspert Pərviz Heydərov “Bakı-Xəbər”ə açıqlamasında qeyd etdi ki, Azərbaycana ən çox pulköçürmə Rusiya və Türkiyədən olur: “Köçürmələrdə artım dinamikasının yaranması soydaşlarımızın çalışdığı ölkələrdə iqtisadi fəallığın yüksəlməsi, gəlirlərinin artması ilə bağlıdır. Amerikadan pul köçürmənin artmasının müəyyən səbəbləri var. İlk olaraq bildirim ki, Azərbaycanın Amerika ilə ticarət əlaqələri var. iqtisadi əlaqələr inkişaf edir. Şirkətlərarası münasibətlərin inkişaf etməsi ölkəyə göndərilən pulun həcminə təsir edir.
Həmçinin, son illərdə ABŞ-da azərbaycanlıların sayının artması bunun əsas səbəbidir: “Həmin ölkədə yaşayan azərbaycanlıların sayının artması istər-istəməz göndərilən pulun həcminin artmasına təsir edir”.
İqtisadçı hesab edir ki, pul köçürmələrinin dinamikasındakı artım meylləri həmin tərəfdaş ölkələrdə yaranmış əlverişli vəziyyətin göstəricisi kimi qiymətləndirilə bilər.
Həmsöhbətimiz onu da əlavə etdi ki, Rusiyadan ölkəmizə pul köçürmələri artan xətt üzrə davam edəcək: “Rusiyadan Azərbaycana göndərilən vəsaitlərin statusu dəyişib. Əvvəllər orada işləyənlər qohumlarına, yaxınlarına pul göndərirdilər. Bu dinamika da müəyyən dəhliz çərçivəsində davam edirdi. Ancaq ötən il Rusiyanın Ukraynaya hücumundan sonra başlanan hadisələr digər məsələni stimullaşdırmağa başladı. Məsələ ondadır ki, Rusiyada güclü kapital axını problemi var və bu, biznesin çökməsi ilə bağlıdır. İş adamları müxtəlif vasitələrlə vəsaitləri ölkədən çıxarır. Onların içində azərbaycanlılar da var ki, vəsaitlərini ölkədən çıxarırlar. Soydaşlarımız müxtəlif yollarla vəsaitləri Azərbaycana göndərir. O üzdən, Azərbaycana pul köçürmələrin kəskin artması əsasən bununla bağlıdır. Soydaşlarımız öz bizneslərini ölkəmizə köçürürlər. Eləsi var ki, əmlakını satıb pula çevirir və sonra Azərbaycana göndərir”.
Günel CƏLİLOVA
