“Orta Dəhlizin həyata keçirilməsində Gürcüstan və Azərbaycan uğurla fəaliyyət göstərirlər”. Bunu Qəbələdə Prezident İlham Əliyev ölkəmizdə səfərdə olan Gürcüstanın Baş naziri İrakli Qaribaşvili ilə mətbuata bəyanatla çıxışı zamanı deyib.
Ölkə başçısının sözlərinə görə, ikitərəfli əlaqələrimizin önəmli hissəsi nəqliyyatla bağlıdır: “Burada da bütün işlər uğurla gedir, plan üzrə gedir. Orta Dəhlizin həyata keçirilməsində Gürcüstan və Azərbaycan uğurla fəaliyyət göstərirlər. Əlbəttə ki, növbəti mərhələdə yükdaşımalarının həcminin artırılması istiqamətində əlavə addımlar atılacaqdır. Mən keçən il və bu il Mərkəzi Asiya ölkələrinə dəfələrlə səfərlər etmişəm və bu il hələ edəcəyəm. Beləliklə, yeni yüklərin Orta Dəhliz üzrə nəql edilməsi üçün çox gözəl imkanlar var. Burada həm bütün inzibati məsələlər öz həllini tapmalıdır, tarif siyasəti vahid prizmadan həll edilməlidir, eyni zamanda, yüklərin cəlb edilməsi və nəqli üçün birgə səylər göstərilməlidir. Təbii ki, bu gün bu məsələ də geniş müzakirə olunub və hələ olunacaq”.
Məsələyə münasibət bildirən millət vəkili Aydın Hüseynovun fikrincə, həqiqətən də yüklərin Orta Dəhliz üzərindən nəql edilməsi üçün çox gözəl imkanlar yaranıb və iştirakçı tərəflər bundan maksumum istifadə etməlidirlər: “Artıq Orta Dəhlizin ciddi bir logistik mərkəzə çevrilməsi qaçılmaz reallıqdır. Asiya ilə Avropanı birləşdirən Transxəzər Beynəlxalq Nəqliyyat Dəhlizinin davamı olan Orta Dəhliz ideyası dünyada baş verən gərgin geosiyasi proseslər fonunda meydana çıxıb. Rusiya ilə Ukrayna arasında gedən müharibə tamamilə yeni reallıqlar yaradıb. Bu, Azərbaycanın Avropa ilə Asiya arasındakı ticarət əlaqələrində mühüm tranzit məntəqəsi olmasını şərtləndirir. Məsələ ondadır ki, Rusiya üzərindən Avropaya yüklərin daşınması demək olar dayanıb. Avropanın Şərqə çıxışının Orta Dəhliz vasitəsi ilə həyata keçiriləcəyi gündəmdədir. Eyni zamanda, Uzaq Şərqdən Avropaya yüklərin təhlükəsiz şəkildə daşınması məhz Orta Dəhliz vasitəsi ilə mümkündür. Reallıq ondan ibarətdir ki, Orta Dəhliz məsafə və müddət baxımından böyük alternativ sayılır. Hesablamalar göstərir ki, Çindən Avropaya gedən yük qatarı Orta Dəhliz vasitəsi ilə 12 gün ərzində 10 min kilometr deyil, 7 min kilometr məsafə qət etməlidir. Görün necə böyük fərq var ortada. İndi əsas məsələ odur ki, Orta Dəhlizin ötürücülük qabiliyyəti artırılsın. Bu istiqamətdə də Azərbaycanla Gürcüstan birgə səylərini gücləndirir. Gürcüstanda yeni dəniz limanı inşa edilir. Bakı-Tbilisi-Qars dəmir yolunun ötürücülük qabiliyyəti artırılacaq. Prezident İlham Əliyevin bununla bağlı mövqeyi Orta Dəhliz vasitəsi ilə daha çox yüklərin daşınmasına, həlli vacib məsələlərin tezliklə həll olunmasına təkan verəcək. Bütün bunlar dəhlizin gələcəkdə dünya iqtisadiyyatında mühüm rol oynamasını təmin edəcək. Çünki Orta Dəhliz yalnız ölkəmiz üçün deyil, regiondakı digər dövlətlərin də iqtisadi maraqlarını əks etdirən irihəcmli beynəlxalq nəqliyyat layihəsidir. Bütün bunlar onu göstərir ki, Orta Dəhlizin çox böyük perspektivi var”.
Vidadi ORDAHALLI
