“Biz Tacikistanda investisiya layihələrini ciddi nəzərdən keçirməyə hazırıq”. Bunu Prezident İlham Əliyev Düşənbədə Tacikistan prezidenti Emoməli Rəhmon ilə birgə mətbuata bəyanatında deyib.
Ölkə başçısının sözlərinə görə, bütün istiqamətlər üzrə necə irəliləmək barədə dəqiq təsəvvürümüz var: “Nəqliyyat-logistika sahəsinə, sənaye kooperasiyasına, investisiya layihələri ilə bağlı məsələlərə dair konkret tapşırıqlar verilib. Biz Tacikistanda investisiya layihələrini ciddi nəzərdən keçirməyə hazırıq. Ona görə ki, əvvələn, Tacikistan bizə yaxın ölkədir, ikincisi, sabitlik hökm sürən ölkədir. İnvestisiyalar yalnız sabitlik və yaxşı investisiya şəraiti olan ölkələrə yönəldilir. Çoxsaylı xarici şirkətlər tərəfindən Tacikistanda fəal sərmayə qoyulması ona dəlalət edir ki, investisiyalar, o cümlədən xarici investisiyalar dövlət tərəfindən qorunur”.
Məlumat üçün qeyd edək ki, 2022-ci ildə Tacikistan-Azərbaycan ticarət dövriyyəsi 6,5 milyon dollar təşkil edib. Bu da Tacikistanın ümumi xarici ticarət dövriyyəsinin 0,1%-ni təşkil edir. İkitərəfli ticarət dövriyyəsinin təxminən 95 faizi Azərbaycan məhsullarının Tacikistana idxalının payına düşür. E.Rahmon Tacikistanın neft-qaz yataqlarının işlənməsində Azərbaycan şirkətlərinin iştirakında maraqlı olduğunu bildirib. İlham Əliyevin məlum səfəri və qeyd etdiyi məqamlar bundan sonra ticarət dövriyyəsinin artmasını nə kimi perspektivlər vəd edir?
“Bütün bunlar nəticə etibarilə iki ölkə arasında ticarət dövriyyəsinin həcminin artmasına öz töhfəsini verəcək”
Sözügedən məsələyə aydınlıq gətirən millət vəkili Vüqar Bayramov bununla bağlı bir sıra məqamlara toxundu: “Əvvəla, son illər Azərbaycanla Orta Asiya ölkələri arasında münasibətlərin inkişaf etməsi müşahidə edilir. Nəzərə almaq lazımdır ki, Azərbaycan təkcə Orta Asiyanın türkdilli ölkələri ilə deyil, Tacikistanla da strateji münasibətlərə malikdir. Tacikistanla həm ticarət əlaqələrinin artırılması, həm birgə investisiya layihələrinin reallaşdırılması əsas prioritetlərdəndir. Məqsəd də ondan ibarətdir ki, bu istiqamətdə daha çox əməkdaşlıq müşahidə olunsun. O baxımdan Prezident İlham Əliyevin son səfəri praktik olaraq Azərbaycan və Tacikistan arasındakı iqtisadi əlaqələrin genişlənməsinə, bu sahədə yeni mərhələnin yaranmasına imkan verəcək. Bu, iki ölkə üçün artıq yeni mərhələnin başlanması anlamına gəlir. Xüsusən də strateji müttəfiqliyin daha da inkişaf etməsi, birgə investisiya qoyuluşlarının reallaşması mühüm nəticələr verəcək. Bütün bunlar nəticə etibarı ilə iki ölkə arasında ticarət dövriyyəsinin həcminin artmasına öz töhvəsini verəcək. Ona görə də hesab edirəm ki, münasibətlərin inkişafı baxımından vacib səfərdir. Bu, birmənalı şəkildə iki ölkə arasında iüqtisadi əməkdaşlığın daha da genişlənməsinə xidmət edəcək. Tacikistanın zəngin yeraltı sərvətləri var. Hesab edirəm ki, Azərbaycanın həmin sahələrə sərmayə yatırması faydalı olar. Tacikistanda xarici sərmayənin həcmi elə də böyük deyil. Bu baxımdan hesab edirəm ki, mövcud potensial imkanlar dəyərləndirilməlidir”.
Vidadi ORDAHALLI
