“Bizim müasir daşımalar infrastrukturumuza tələbat heç vaxt olmadığı qədər böyükdür”. Bunu Prezident İlham Əliyev Bakıda işə başlayan “Dünya bu gün: Çağırışlar və ümidlər” mövzusunda X Qlobal Bakı Forumunun açılış mərasimində çıxışında bildirib.
Ölkə başçısı çıxışında qeyd edib ki, ötən il Azərbaycan ərazisindən keçən tranzitin həcmi 75 faizdən çox artıb: “Bizim müasir daşımalar infrastrukturumuza tələbat heç vaxt olmadığı qədər böyükdür - dəmir yolları və avtomobil yolları mövcuddur, Xəzər dənizində ən böyük donanma və regionda ən geniş yük aviaparklarından biri yaradılıb. Biz daşımaların təhlükəsizliyinə həqiqətən də böyük töhfə vermişik. Çünki bu gün bir çox ölkənin daşımaların təhlükəsizliyinə ehtiyacı var. Onlar yeni marşrutlar axtarışındadır və həmin yeni marşrutlardan biri Azərbaycandan keçir”.
Prezidentin çıxışından belə məlum oldu ki, qarşıdakı dövrdə Azərbaycan üzərindən daşımaların həcmi daha da artacaq.
“Bütün bunlar çox önəmli faktorlardır və ölkəmizin beynəlxalq tranzit daşımalarda əhəmiyyətini daha da artırır”
Sözügedən məsələ ilə bağlı fikirlərini “Bakı-Xəbər”lə bölüşən iqtisadçı-ekspert Fuad İbrahimovun fikrincə, Azərbaycan üzərindən daşımaların ciddi həcmdə artması qaçılmazdır: “Bunun üçün xəritəyə nəzər yetirmək kifayətdir. Bu gün quru istiqamətində şimaldan cənuba bütün dəhlizlər üzrə demək olar süni tıxac yaranıb. Bunun səbəbi də Rusiya və İranın yeritdiyi yanlış siyasətdir. Biz bu günü düşünmürdük. Yəni düşünmürdük ki, Rusiya Ukraynaya hücum edəcək və belə bir vəziyyət yaranacaq. Sadəcə olaraq, illər boyu sağlam elastik dəhlizlərin yaranması istiqamətində işlər görmüşdük. Təsadüfi deyil ki, bu gün biz Xəzər dənizində böyük, müasir dəniz limanı inşa etmişik. Gəmilərin sayına, keyfiyyətinə, yeniliyinə görə seçilən donanmamız mövcuddur. Regionda ən yeni, sonuncu və yükaşırma qabiliyyəti olan təyyarə parkı, hava limanları bizdədir. Deməyim odur ki, illər boyu biz dayanmamışıq. Müasir dövrün tələblərinə uyğun dəmir yolunun yenidən qurulması, bərpası istiqamətində böyük işlər görülüb. 2017-ci ildə Bakı-Tbilisi-Qars dəmir yolu istifadəyə verildi. Bu yol daha tez hazır olardı, amma 2008-ci ildə Rusiya-Gürcüstan müharibəsi və ardınca dünya maliyyə böhranı tikintinin ləngiməsinə səbəb oldu. Hazırda Çindən Avropaya Azərbaycan üzərindən yük daşınır və bu, 2 həftəyə başa gəlir. Çin kimi nəhəng, qüdrətli dövlət Azərbaycan üzərindən daşımaları qiymətləndirir. Bütün bunlar çox önəmli faktorlardır və Azərbaycanın beynəlxalq tranzit daşımalarda əhəmiyyətini daha da artırır. Ona görə də biz qısa zamanda yükdaşıma işini daha da təkmilləşdirməliyik. Prosedurları, yoxlamaları sadələşdirməliyik. Bütün bu işlər qaydasında gedərsə, o zaman Azərbaycan üzərindən tranzit daşımalara maraq daha da artacaq. Bu isə nəticə etibarı ilə ölkəmizin tranzit gəlirlərinin artmasına stimul verəcək”.
Vidadi ORDAHALLI
