Hazırda ölkəmizdə və dünya təcrübəsində insan həyatının qarşılaşa biləcəyi risqlərin idarə olunması üçün istifadə olunan ən effektiv metodlardan biri həyatın sığortalanması prosedurudur. Yəni biz başımıza gələ biləcək xoşagəlməz hadisələrdən özümüzü sığortalayaraq, bir növ, gələcəyimizi risqlərə qarşı qarantiyə almış oluruq.
Eyni zamanda bunu həm maddi, həm mənəvi cəhətdən sevdiklərimiz üçün də düşünülmüş addım hesab etmək olar. Açıqlanan statistik rəqəmlərə əsasən, ötən illərdən fərqli olaraq, könüllü sığortaya maraq artıb.
2023-ci ilin yanvar ayı ərzində Azərbaycanda könüllü sığorta növləri üzrə 115 mln. 625 min manat vəsait toplanılıb. 2022-ci ilin yanvar ayı ilə müqayisədə könüllü sığorta növləri üzrə toplanan sığorta haqqları 16.5% və ya 16 mln. 323 min manat artıb. Ancaq icbari sığortada isə vəziyyət fərqlidir. Belə ki, icbari sığorta növləri üzrə 18 mln. 323 min manat sığorta haqqı toplanıb. İcbari sığorta növləri üzrə sığorta daxil olmaları isə 1.16% və ya 215 min manat azalıb.
Açıqlanan rəqəmlərdən də bəlli olur ki, könüllü sığortaya maraq artıb, icbari sığortada isə yığım azalıb. Maraqlı məqam ondan ibarətdir ki, icbari sığortada yığım niyə azalıb, axı bu sığorta növündə ödəniş məcburidir?
“Ölkəmizdə könüllü həyat sığorta növləri sığorta yığımlarına görə ən çox yığım olan sığorta növlərindən biridir”
Iqtisadçı Kamran Məmmədli bildirdi ki, ölkəmizdə könüllü həyat sığorta növləri sığorta yığımlarına görə ən çox yığım olan sığorta növlərindən biridir: “Vətəndaşlar bu növ sığortaya könüllü şəkildə cəlb olunurlar. Həyat sığortasında isə həyatımızın yaşamla bağlı olan məsələlərinə bu təsir edir. Hazırda həyatın yaşam sığortası vardır ki, bu, könüllü növlərə aiddir. Bizim əmək haqqımızın aşağı və ya yuxarı olmasından asılı olaraq burada sığortalanmaq mümkündür. Yəni biz öz həyatımızı sığortalayırıq. Həyatımızın hər hansısa bir məqamında biz əgər xəsarət alırıqsa, ömrümüzü bitiririksə yəni qəfildən gözlənilməz hadisələr baş verdiyi zaman bizim varislərimiz üçün sığorta kompensasiyaları verilir. Və bu sığorta kompensasiyaları böyük həcmdə verilir. Bu bizim əməkhaqımızın 50 faizi qədər hansı ki, sosial ödənişlərlə bağlı hissəsi yığılır, üç və ya beş illik müddətdə yığım sığortasında toplanır, üzərinə müəyyən dərəcədə faiz gələrək müqavilə müddətinin sonunda sığortalılara geri qaytarılır. Yəni bu ölkəmiz üçün ən optimal olan variantdır”.
Ekspert onu da vurğuladı ki, son zamanlar sığorta bazarında müəyyən dəyişikliklər baş verir: “Əksər sığorta şirkətləri kiçik mühərrikləri avtomobilləri sığorta etməkdən imtina edir. Onlar paytaxtda baş verən qəzaların 90 faizinin taksi fəaliyyətinə yönəldilən “Toyota Prius”, “Opel Astra”, “Kia Rio” və digər kiçik mühərrikli nəqliyyat vasitələri ilə bağlı olduğunu düşünür və buna görə də şirkətlər onları zərərli hesab edir. Bu səbəbdən də sığorta şirkətləri bu nəqliyyat vasitələrini sığorta etməkdən imtina edir. Bu da yığıma təsir edir”.
Günel CƏLİLOVA
