İşğaldan azad edilmiş ərazilərdə aparılan bərpa-quruculuq işləri həmin yerlərə yenidən həyat verir. Erməni faşistlərinin həmin ərazilərə vurduğu ciddi ziyan tədricən aradan qaldırılır. Əslində, şəhərlər, kəndlər yenidən qurulur. Azad edilmiş bütün ərazilərdə quruculuq-abadlıq işləri sürətlə aparılır.
Prezident İlham Əliyevin 2022-ci il 16 noyabr tarixli Sərəncamı ilə “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı” təsdiq olunub. Dövlət Proqramının icrası üzrə Tədbirlər Planında hər bir yaşayış məntəqəsi üçün konkret hədəflər və tələblər qoyulub. İşçi qrupda təmsil edilən bütün qurumlar nəzərdə tutulan işlərin həyata keçirilməsi üçün səfərbər olunmalıdırlar. İşğaldan azad olunmuş bütün ərazilərdə genişmiqyaslı tikinti-quruculuq işləri sürətlə davam edir.
Yarımstansiyaların sayı 9-a çatıb
İşğaldan azad olunmuş ərazilərdə infrastruktur layihələri sürətlə icra olunur. Azad edilmiş torpaqlarda yarımstansiyaların sayı 9-a çatıb. “Ağdam-1” və “Ağdam-2” yarımstansiyalarının fəaliyyəti nəticəsində bütün rayon elektrik enerjisi ilə dayanıqlı şəkildə təmin ediləcək. Ağdamda müasir mehmanxana təqribən 2 ildən sonra fəaliyyətə başlayacaq. 210 çarpayılıq Ağdam Mərkəzi Şəhər Xəstəxanasının inşası ağdamlılara tibbi xidmətin göstərilməsi üçün imkanlar yaradacaq. Ağdama qaz xətlərinin çəkilişi layihəsi işlənilir. İçməli suyun gətirilməsi, o cümlədən Xaçınçay su anbarının təmiri layihəsi İnvestisiya Proqramında öz əksini tapıbdır. Bərdə-Ağdam avtomobil yolu, dəmir yolu inşa edilir. Avtomobil yolu təqribən bir ilə hazır olacaq. Füzuli-Ağdam avtomobil yolunun çəkilişi layihəsi artıq icra olunmağa başlayıb. Bu yol həm Füzuli və Ağdam şəhərlərini birləşdirəcək, eyni zamanda, Ağdamı Füzuli Beynəlxalq Hava Limanı ilə birləşdirəcək və Ağdama başqa ölkələrdən gəlmək daha asan olacaq. Ümumilikdə qurulan müasir yol-nəqliyyat infrastrukturu işğaldan azad olunmuş ərazilərə gediş-gəlişi və yüklərin daşınmasını asanlaşdıracaq.
Sevindirici haldır ki, azad edilmiş rayonlarımızda yol-nəqliyyat infrastrukturu yüksək standartlara cavab verən səviyyədə qurulur. Xüsusi əhəmiyyətə malik Zəfər yolu artıq istismara verilib. Əhmədbəyli-Füzuli-Şuşa, Əhmədbəyli-Horadiz-Cəbrayıl-Zəngilan-Ağbənd, Füzuli-Şükürbəyli-Cəbrayıl-Hadrud avtomobol yollarında və Horadiz-Ağbənd dəmir yolunda isə işlər sürətlə davam edir.
Füzuli şəhərinin də baş planı təsdiq olunub. Ölkə başçısı cənab İlham Əliyevin rayon ictimaiyyətinin nümayəndələri ilə görüşü zamanı Füzuli şəhərinin Baş planı ilə tanış olunub və müsbət rəylər bildirilib. Prezident İlham Əliyev tərəfindən Dövlətyarlı kəndində “Ağıllı kənd”, Füzulidə Mərkəzi Şəhər Parkı, Rəqəmsal Stansiya İdarəetmə Mərkəzi, Çoxmənzilli yaşayış binası, Füzuli Memorial Kompleksinin (Zəfər və işğal Muzeyi) və Füzuli-Ağdam avtomobil yolunun təməlqoymasını həyata keçirilib. Beynəlxalq və regional əhəmiyyətli Füzuli Beynəlxalq Hava Limanının cəmi 8 aya istifadəyə verilməsi dövlətimizin iqtisadi gücünün və potensialının nəticəsidir. İşğaldan azad edilmiş ərazilərdə enerji təminatında xüsusi əhəmiyyətə malik Füzuli yarımstansiyasının açılışı ölkə başçısı cənab İlham Əliyev tərəfindən ötən il həyata keçirildi.
Görülən bütün işlər Azərbaycanın daxili vəsaiti hesabına reallaşdırılır
Vətən müharibəsində işğaldan azad edilmiş ərazilərin su və enerji potensialı kifayət qədər böyükdür. Azərbaycan postmüharibə mərhələsində bu potensialdan maksimum səmərə ilə və ekoloji normaları gözləməklə istifadə etmək niyyətindədir. Azərbaycan Respublikasının Prezidenti İlham Əliyev və birinci xanım Mehriban Əliyeva Füzuli rayonundakı Aşağı Köndələnçay su anbarında olublar. Ümumi tutumu 9,5 milyon kubmetr olan bu su mənbəyi 6200 hektar sahəni suvarmağa imkan verirdi. Xatırladaq ki, bu su anbarı Ulu Öndər Heydər Əliyevin göstərişi və təşəbbüsü ilə 1980-ci illərin əvvəllərində inşa edilib. 1993-cü ildə Füzuli rayonu erməni qəsbkarları tərəfindən işğal ediləndən sonra su anbarının Azərbaycan tərəfindən istismarı qeyri-mümkün olub. Hazırda Azərbaycan işğaldan azad olunmuş ərazilərdə enerji mənbələrinin bərpası istiqamətində də ayrıca proqram reallaşdırır. Artıq Laçın rayonunun ərazisində “Güləbird” Su Elektrik Stansiyası bərpa olunaraq Prezident İlham Əliyevin iştirakı ilə istifadəyə verilib. Onu da vurğulayaq ki, Azərbaycan son illərdə özünün enerji müstəqilliyinin möhkəmləndirilməsi istiqamətində böyük uğurlara imza atıb. Hazırda elektrik enerjisinə olan daxili tələbatını tam yerli istehsal hesabına ödəyən respublikamız xarici ölkələrə müəyyən həcmlərdə enerji ixrac edir. İşğaldan azad olunmuş ərazilərdəki enerji mənbələrinin bərpası nəticəsində respublikamızın enerji ixracı imkanları daha da artacaq. Ümumiyyətlə, yaradılan yüksəksəviyyəli infrastruktur həm işğaldan azad olunmuş ərazilərin iqtisadi potensialından səmərəli istifadə edilməsində, həm də ora qayıdacaq insanların normal həyat şəraiti ilə təmin olunmasında mühüm rol oynayacaq.
Bütün bunlar - görülən bütün işlər Azərbaycanın daxili vəsaiti hesabına reallaşdırılır. İcra olunan layihələr onu göstərir ki, bütün maliyyə və texniki imkanları, habelə kadr potensialı peşəkar şəkildə səfərbər olunubdur. Əlbəttə ki, müxtəlif xarici şirkətlər artıq bu işlərdə fəal iştirak edir və bu şirkətlərin sayı artmaqdadır. Bu da öz növbəsində Azərbaycana olan müsbət maraqların artmasının nəticəsidir.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
