"Bank of Baku”da əmanəti olan şəxslərin əmanətləri risq altındadır. Məlumata görə, “Bank of Baku”nun dollarla 2 və 3 illik qəbul etdiyi əmanətləri Əmanətlərin Sığortalanması Fondu sığortalamır. Əmanətlərin sığortalanması haqqında qanuna görə, 1 iyun 2020-ci il tarixindən etibarən xarici valyutada olan və qorunan əmanətlər üzrə illik faiz dərəcəsinin yuxarı həddi 2,5 faiz olaraq müəyyən edilib.
"Bank of Baku”da 2 illik yerləşdirilən əmanətlərin faizi aylıq ödənildikdə 2.55 faiz, əmanətin illik faizini müddətin sonunda ödəmək şərti ilə 2.65 faiz olaraq müəyyən edib. Buna görə də Əmanətlərin Sığortalanması Fondu ərəfindən həmin əmanətlər sığortalanmır.
Maraqlıdır, Əmanətlərin Sığortalanması Fondunun adıçəkilən banka məxsus əmanətləri sığorta etməməsi bankdakı əmanətlərin taleyi necə olacaq? Hazırkı vəziyyətdə bu bankda əmanəti olanlar nə etməlidir? Bundan sonrakı proses necə irəliləməlidir?
“Biz deyə bilmərik ki, bank camaatı aldadır, sadəcə, bank daha yüksək faiz vermək istəyir və vətəndaş da bu halda başa düşməlidir ki, əmanəti sığortalanmayacaq”
Bank sahəsi üzrə ekspert Əkrəm Həsənov bildirdi ki, əmanətləri “Bank of Baku” özü sığortalamır demək olmaz, çünki buna qanun imkan vermir: “Azərbaycanda əmanətlərin qorunması meyarına görə, əgər əmanət milli valyutadadırsa, onun faizi 12 faizdən çox, xarici valyutadadırsa 2.5 faizdən çox olmamalıdır. Hansısa bankda bu faiz dərəcələri 2.5-dən yuxarıdısa (2.55-2.65 və s.), o zaman bu, qorunmayan əmanət hesab olunur. Heç kim vətəndaşı əmanətini bu faizlə qoymağa məcbur etmir. Vətəndaşın hətta “Bank of Baku”da da seçim imkanı var. Müştəri deyə bilər ki, mən əmanət faizinin 2.55 yox, 2.5 olmağını istəyirəm. Yəni bank üçün onun heç bir fərqi yoxdur. Bank müştəriyə daha yüksək faizi sadəcə təklif edə bilər. Lakin seçim müştərinindir. Bank da bununla razılaşacaq. Heç bir problem yoxdur. Vətəndaş sadəcə bu şərtləri bilməlidir və bağladığı müqaviləyə də baxmalıdır. Biz deyə bilmərik ki, bank camaatı aldadır, sadəcə, bank daha yüksək faiz vermək istəyir və vətəndaş da bu halda başa düşməlidir ki, əmanəti sığortalanmayacaq. Çünki faizin yüksək həddi var. Ancaq vətəndaşı da heç kim buna məcbur etmir".
Günel CƏLİLOVA
