Fevralın 6-da yerli vaxtla saat 04:17-də Türkiyənin Kahramanmaraş vilayətinin Pazarcık rayonunda 7,7 bal, saat 13:24-də isə Elbistan rayonunda 7,6 bal gücündə iki zəlzələ baş verib. Dərinliyi 7 kilometr olan zəlzələ 10 vilayətdə ciddi dağıntılara səbəb olub. Zəlzələdən zərər çəkmiş 10 vilayətdə üç ay müddətinə fövqəladə vəziyyət rejimi elan edilib.
Qeyd edək ki, Türkiyədə zəlzələ baş verən vaxtdan 10 gün ərzində bu ölkədən Azərbaycana 8897 nəfər gəlib. Dövlət Miqrasiya Xidmətindən verilən məlumatda qeyd edilib ki, Türkiyə Respublikasında zəlzələ baş verdiyi 6 fevral 2023-cü il tarixindən 16 fevral 2023-cü il tarixinədək Azərbaycan Respublikası ərazisinə 8897 nəfər Türkiyə vətəndaşı daxil olub.
Son günlər Türkiyədən ölkəmizə gələn vətəndaşların sayının artması Bakıda kirayə mənzil qiymətinin artmasına səbəb olub. Hazırda paytaxtda kirayə mənzillərin qiyməti ərazidən asılı olaraq dəyişir. Bakının mərkəzi ərazilərində 1 otaqlı ev əvvəllər 500-550 manata təklif edilirdisə, indi həmin mənzillərin qiyməti 600-700 manat arasında dəyişir.
“Bakıda mənzillərə tələbatın qardaş ölkədə baş verən zəlzələdən sonra artması psixoloji gərginliklə bağlıdır”
Əmlak məsələləri üzrə ekspert Elnur Fərzəliyev bizimlə söhbətində bildirdi ki, hazırda kirayə mənzillərin qiyməti ötən aylarla müqayisədə 10-15 faiz bahalaşıb. Bunu qardaş ölkədə baş verən zəlzələdən sonra psixoloji gərginliklə bağlayan ekspertin sözlərinə görə, bu ölkədən Azərbaycana gələnlərin sayının artması fonunda kirayə mənzillərin bahalaşması isə müvəqqətidir: "Bu müvəqqəti xarakter daşıyır. Bakıya gələn türk vətəndaşlarının uzun müddət Bakıda kirayə qalması gözlənilən deyil. Onların çoxu zəlzələdən sonra narahatlıq keçirdiklərindən öz ölkələrini tərk edirlər. Amma mən inanmıram ki, bu uzun müddət davam etsin. Çünki həmin insanların işləri, evləri Türkiyədədir. Onlar bu narahatlıq səngidikdən sonra yəqin ki, öz vətənlərinə geri dönəcəklər. Bu isə Bakıda kirayə mənzil bazarında baş vermiş qiymət artımının yenidən səngiməsinə səbəb olacaq".
Həmsöhbətimiz onu da əlavə etdi ki, kirayə mənzillərin qiymətini artma səbəblərindən biri də Bakıda köhnə binaların sökülməsidir. Həmin binalarda yaşayan sakinlərin 2-3 il ərzində kirayədə yaşaması mənzil qıtlığına səbəb olur. Təbii ki, bu kimi faktlar kirayə mənzillərin satış qiymətinə təsir edir.
Günel CƏLİLOVA
