“Bank VTB”dən kredit götürən şəxslər məbləği və faizi tam şəkildə ödəsələr də kredit bitmir, üstəlik vətəndaşa cərimə də yazılır. Son zamanlar bu mövzu ilə bağlı şikayətlərin sayı artıb. Şikayətçilər sosial şəbəkədə yazaraq qeyd edirlər ki, insanlar “Bank VTB”dən bir kredit götürəndə sevinir, bir də krediti bağlayanda.
Vətəndaş qeyd edir ki, 2 il müddətinə 3 min manat kredit götürüb: “Aylıq ödənişləri vaxtında ödəsə də, onun adından borc silinməyib. Üstəlik, buna görə müştəriyə cərimə də yazılıb. Hər ay krediti tam məbləğdə (156 manat) və vaxtı keçmədən ödəmişəm. Kredit aprel ayında bitməli idi. Bu gün banka getdim. Mənə bildirdilər ki, “siz hər ay krediti ödəyəndə zəng edib ödəniş etdiyinizi bildirməlisiniz ki, borc adınızdan silinsin”.
Maraqlıdır, vətəndaşın kredit borcunu ödədiyi təqdirdə, banka zəng edib məlumat verməsinin tələb olunması nə dərəcədə doğrudur?
“Belə hallarda vətəndaş hüquqlarını müdafiə etmək üçün ödənişi həyata keçirdikdən sonra verilən çeki uzun müddət özündə saxlamalıdır”
Bank məsələləri üzrə mütəxəssis Əkrəm Həsənov bildirdi ki, müştəri krediti aybaay ödədikdən sonra banka zəng edib bildirməsinə ehtiyac yoxdur: “Müştərinin əlində çekləri var, orada bütün detallar, ödəniş tarixi göstərilib. Kredit ödənildikdən sonra bunu banka zəng edib bildirməyə ehtiyac yoxdur. Əgər bank ödənişin edildiyindən məlumatsızdırsa, o zaman bankda idarəçilik pisdir, uçot sistemi düzgün qurulmayıb. Əslində heç bir bankda belə bir hal yoxdur. Hətta bank zəng edib bildirmək tələbi ilə yanaşı, müştəriyə gecikmə ilə bağlı cərimə yazıbsa, o zaman burada dələduzluqdan söhbət gedə bilər. Bu o deməkdir ki, bankın daxilində “oğru” işçilər var, onlar bankı aldadır və kredit ödənişini uçota almırlar”.
Ekspert hesab edir ki, belə hallarda vətəndaş hüquqlarını müdafiə etmək üçün ödənişi həyata keçirdikdən sonra verilən çeki uzun müddət özündə saxlamalıdır.
Günel CƏLİLOVA
