Xəbər verildiyi kimi, Rusiya martın 1-dən başlayaraq buğda ixracı vergisini ikiqat artıracaq. İyulun sonuna qədər bir ton buğda üçün tətbiq olunan ixrac vergisi 50 avroya, qarğıdalı üçün 25 avroya, arpa üçün isə 10 avroya qaldırılacaq.
Məlumat üçün bildirək ki, Azərbaycana buğda idxalının təxminən 95 faizi Rusiya Federasiyasının payına düşür.
Rusiyada buğda ixracı vergisinin artırılması Azərbaycana necə təsir edəcək?
“Rusiyanın müvafiq qərarı yeni məhsul yığımına qədər, yəni iyulun sonuna və avqustun əvvəlinədək qüvvədə olacaq”
“Liberal İqtisadçılar” İB-nin sədri Akif Nəsirli “Bakı-Xəbər”ə açıqlamasında qeyd etdi ki, buğda idxalının 90 faizdən çoxu Rusiyanın üzərinə düşür: “Məlumat üçün deyim ki, artıq bu il üçün ölkəyə lazım olacaq həcmdə buğda gətirilib. Gətirilən buğda köhnə qiymətə alınıb. Buğda Rusiya ilə yanaşı, Qazaxıstan və Ukraynadan da idxal olunur. Onu da nəzərə almaq lazımdır ki, bu il Qazaxıstan və Ukraynadan idxal olunacaq buğdanın həcmi ötən illə müqayisədə artıq olacaq”.
Həmsöhbətimiz hesab edir ki, Rusiya tərəfindən buğda ixracı vergisinin artırılması hazırda ölkəmizə tam şəkildə təsir göstərməyəcək. Çünki ölkənin buğda ehtiyatı kifayət qədərdir: “Onu da deyim ki, buğda idxalı ilə bağlı Rusiya ilə imzalanan müqavilələrin bir qismi bu ay – fevralda olub. Yəni yeni qiymət mart ayından imzalanacaq müqavilələrə şamil olunacaq. Rusiyada buğda ixracı vergisinin artırması o demək deyil ki, dərhal ölkəmizə un və çörək məhsullarının qiyməti artacaq. Qiymət artımı gələcəkdə mümkün ola bilər. Qiymət artımının qarşısını almaq olar. Çörək və digər un məhsullarının qiymətinin qarşısını yalnız idxaldan əlavə dəyər vergisini götürməklə almaq mümkündür. Yəqin ki, Rusiyanın müvafiq qərarı yeni məhsul yığımına qədər, yəni iyulun sonuna və avqustun əvvəlinədək qüvvədə olacaq. Azərbaycan hökuməti unun idxalına qoyulan əlavə dəyər vergisini götürməklə qiymət artımının qarşısını almalıdır”.
Günel CƏLİLOVA
