Rusiyanın ermənipərəst media resursları Azərbaycan Dövlət Gömrük Komitəsinin statistik rəqəmlərinə istinad edərək, bu ilin yanvar ayında qeydə alınan bəzi iqtisadi azalmaları böyük həvəslə dərc ediblər.
Məlumatda qeyd edilir ki, 2023-cü ilin yanvar ayının yekunlarına görə, Azərbaycanın xarici ticarət dövriyyəsi 2022-ci ilin yanvar ayı ilə müqayisədə 19 faiz, yaxud 772 milyon dollar azalaraq 4,061 milyard dollardan 3,289 milyard dollara düşüb. Xarici ticarət dövriyyəsində ixrac 1,877 milyard dollar təşkil edib ki, bu da 2022-ci ilin analoji ayı ilə müqayisədə 1,21 milyard dollar və ya 1,64 dəfə azdır. Xarici ticarət dövriyyəsində ixracın payına ötən ilki 76 faizlə müqayisədə 57,06 faiz düşüb. Hesabat dövründə Azərbaycanda idxal illik hesablamada 974,86 milyon dollardan 437,83 milyon dollar və ya 44,9 faiz artaraq 1,412 milyard dollardan yuxarı olub. Xarici ticarət dövriyyəsində idxalın payına ötən ilki 24 faizlə müqayisədə 42,94 faiz düşüb. Nəticədə hesabat dövründə xarici ticarət dövriyyəsinin saldosu müsbət olaraq qalmaqla illik hesablamada ötən ilki 2,112 milyard dollarla müqayisədə 1,648 milyard dollardan çox və ya 3,5 dəfə azalaraq 464 milyon dollara çatıb.
Daha sonra bunu əlavə ediblər: “Maraqlıdır ki, Cənubi Qafqazın ən böyük iqtisadiyyatının xarici ticarət həcminin əhəmiyyətli dərəcədə azalması Rusiyanın Ukraynada xüsusi əməliyyata başlamasından sonra Bakının Avrasiyada “yeni logistika xəritəsi”nə sığmaq üçün aktiv cəhdləri fonunda baş verib. Azərbaycan paytaxtında əvvəllər bildirilib ki, müasir geosiyasi reallıqlar Avrasiya məkanında logistik xəritənin dəyişməsinə və yük axınlarının “alternativ” istiqamətlərinin formalaşmasına gətirib çıxarır”.
“İlin yalnız bir ayında baş verən iqtisadi azlmanı bütün ilə şamil etmək doğru deyil”
Məsələyə münasibət bildirən ekspert Rəsul Cahangirlinin fikrincə, Rusiya mediası Azərbaycandakı iqtisadi azalmaya siyasi rəng verməyə çalışır: “Məsələ ondadır ki, burada təkcə bu ilin yanvar ayındakı statistik göstəricilərindən söhbət gedir. Bəli, ötən ay xarici ticarət dövriyəmizdə azalma var. Ancaq bu o demək deyil ki, ilin sonunan qədər belə olacaq və 12 ay boyunca iqtisadi azalma davam edəcək. Qətiyyən bu belə deyil. Ən azından ona görə ki, 2022-ci ili Azərbaycan böyük iqtisadi artımla başa vurdu. İlin yalnız bir ayında baş verən iqtisadi azlmanı bütün ilə şamil etmək doğru deyil. Yanvar ayında iqtisadi azalma bir sıra amillərlə əlaqədardır. Yəni, burada həm obyektiv, həm də subyektiv səbəblər var. Bunun bir səbəbi onunla bağlıdır ki, Avropada qazın qiyməti ucuzlaşıb. Ötən il qazın qiyməti daha baha idi. Bu da əsasən Ukrayna müharibəsi ilə əlaqədar idi. Üstəlik, Rusiyanın Ukraynaya hücumu bütün dünya iqtisadiyyatına öz mənfi təsirini göstərib. Xüsusən də Avropa İttifaqı iqtisadiyyatı daha çox təsirə məruz qalır. Tranzit daşımalara gəldikdə isə, Azərbaycan üzərindən daşımalar mərhələ-mərhələ artır. Bununla bağlı infrastruktur tam hazır olandan sonra gəlirlərimiz daha da artacaq. Bu kimi məsələlər bir anda həll olunmur. O baxımdan əminəm ki, qarşıdakı aylarda Azərbaycanda ticarət dövriyyəsi yanvar ayı ilə müqayisədə daha yüksək olacaq”.
Vidadi ORDAHALLI
