Prezident İlham Əliyev müstəqillik dövrünün ən böyük İstilik Elektrik Stansiyasının təməlqoyma mərasimində bildirib ki, Mingəçevirdə əsası qoyulan və təxminən 1300 meqavat gücündə olan yeni stansiya 1 milyard kibmetrə qədər qaza qənaət etməyə imkan verəcək:
“Mingəçevir şəhərinin Azərbaycanın və nəinki Azərbaycanın, bütün Qafqazın elektroenergetika mərkəzi kimi yeni dövrü başlayır, təxminən 1300 meqavat gücündə olan stansiya əlbəttə ki, bizim potensialımızı böyük dərəcədə gücləndirəcək. Bu, Azərbaycanın enerji təhlükəsizliyinə verilən növbəti töhfə olacaq, yüzlərlə yeni iş yerləri yaranacaq və beləliklə, Azərbaycan öz imkanlarından tam istifadə edərək həm daxili tələbatı ödəyəcək, eyni zamanda, həm elektroenergetika, həm də təbii qaz sahəsində daha böyük addımlar atacaq. Çünki yeni tikiləcək stansiyada şərti yanacağın sərfiyyatı kifayət qədər aşağıdır və bu, imkan verəcək ki, ildə təqribən 800 milyon kubmetr və ya 1 milyard kubmetr qaza qənaət edilsin. Bu gün Avropa məkanında Azərbaycan qazına böyük tələbat olduğu üçün bu, eyni zamanda, Avropanın enerji təhlükəsizliyinə növbəti töhfə olacaqdır”.
Bütün bu deyilənlərin fonunda, 1 milyard kubmetr qaza qənaət olunması bizim üçün nə demək olacaq?
“Azərbaycan bunun sayəsində 1 milyard kubmetr qaza qənaət edəcək və onu daha çox ixraca yönəldəcək”
Məsələyə münasibət bildirən millət vəkili Vüqar Bayramovun fikrincə, qənaət olunacaq təbii qaz ixrac olunacaq və bundan daha çox vəsait əldə ediləcək: “Azərbaycanda 1300 meqavat gücündə yeni İES-in təməlqoyma mərasiminin həyata keçirilməsi ölkəmizin gücünü göstərən əsas faktorlardandır. Çünki Azərbaycanda enerji sahəsinə kifayət qədər böyük həcmdə sərmayə qoyuluşu həyata keçirilib. Bu da ondan xəbər verir ki, bütövlükdə bu istiqamətdə sərmayənin genişləndirilməsi ciddi perspektivlər vəd edir. Çünki bütün bunlar həm Azərbaycanda elektrik enerjisi istehsalının artmasına, həm də onun daha çox ixrac olunmasına imkan verəcək. Bu isə ölkənin enerji təminatının daha da yaxşılaşması, o cümlədən, bu sektorun inkişafı baxımından vacibdir. Çünki bu sahəyə qoyulan sərmayə həm də yeni iş yerlərinin yaradılması deməkdir. Başqa bir tərəfdən, yeni İES-in istifadəyə verilməsi həm də bütövlükdə təbii qaza qənaət edilməsi baxımından vacibdir. Azərbaycan bunun sayəsində 1 milyard kubmetr qaza qənaət edəcək və onu daha çox ixraca yönəldəcək. Çünki yeni texnologiyalar əsasında qurulacaq İES qaz sərfiyyatına əhəmiyyətli dərəcədə qənaət etməyə imkan verəcək. Azərbaycanın illik qaz istehlakı 13 milyard kubmetrdir. Ümumilikdə, ölkədə bütün növ elektrik stansiyalarının sayının artması daxildə təbii qaza olan tələbi azaldacaq. Qaza edilən qənaət Azərbaycanın ixrac imkanlarını genişləndirəcək. Qaz ixracından həm daha çox valyuta daxil olacaq, həm də ölkəmizin geosiyasi çəkisi artacaq. Azərbaycanın Avropanın enerji təhlükəsizliyində rolunun artmasına imkan yaradacaq. O baxımdan bunun çoxşaxəli faydası olacaq”.
Bir sözlə, millət vəkili bunu çox əhəmiyyətli bir layihə hesab edir.
Vidadi ORDAHALLI
