Türkiyədə minlərlə insanın ölümü və yaralanması ilə nəticələnən dəhşətli zəlzələ Azərbaycanın əmlak bazarına da təsir göstərir. Faciəvi hadisədən sonra Bakıda hündürmərtəbəli bina evlərinin alqı-satqısında durğunluq yaranıb. Yeni tikililərin təhlükəli olduğunu düşünən insanların daha çox həyat evlərinə üstünlük verdikləri deyilir.
Araşdırmalar zamanı məlum olub ki, əvvəlki günlərlə müqayisədə son bir həftə ərzində Bakıda həyət evlərinin qiyməti bahalaşıb. Mənzil bazarına üz tutan vətəndaşlara qiymət artımının zəlzələ ilə əlaqədar olduğu deyilir.
“Qardaş ölkədə baş verən zəlzələ nəinki Türkiyənin, eləcə də Azərbaycanın və digər qonşu ölkələrin daşınmaz əmlak sahəsinə təsir göstərəcək”
Əmlak məsələləri üzrə ekspert Elnur Fərzəliyev bildirdi ki, qardaş ölkədə baş verən zəlzələ nəinki Türkiyənin, eləcə də Azərbaycanın və digər qonşu ölkələrin daşınmaz əmlak sahəsinə, xüsusən də çoxmərtəbəli binaların satışına ciddi təsir göstərir və göstərəcək. Çünki zəlzələ təkcə Türkiyədə deyil, dünyanın müxtəlif ölkələrində baş verir: “Görünən odur ki, itkilər və tələfatlar daha çox çoxmərtəbəli binalarda yaşanıb. Zəlzələ zamanı insanların çoxmərtəbəli binalardan çıxması, evakuasiya olunması, lift və ya pilləkənlər vasitəsilə qaçmağa çalışması çoxmərtəbəli binalarda ciddi çətinliklər yaradır. Burada həm də qaçarkən xəsarətlər almaq ehtimalı da çox olur. Belə faktlar insanlarda qorxu və həyəcana gətirib çıxarır. Hazırda Türkiyədə baş verən zəlzələ Bakı sakinlərini də qorxuya salıb. Buna görə də, paytaxt ərazisində yaşayan bir çox insanlar həyət və bağ evlərinə köçməyə çalışır. Əlbəttə ki, bu cür fəlakətlərdən heç kim sığortalanmayıb. Ancaq Azərbaycanda belə güclü zəlzələnin və tələfatın olacağını düşünmürəm”.
Həmsöhbətimiz onu da əlavə etdi ki, Bakının bəzi ərazilərində çoxmərtəbəli binalar çox sıx şəkildə inşa edilib. Binalararası məsafələr qorunmayıb. Yalnız bir giriş hissəsindən ibarət olan böyük yaşayış massivləri var ki, hansısa təbii fəlakət baş verərsə, orada ciddi təhlükələr yaranacaq: “Hesab edirəm ki, Türkiyədəki zəlzələdən sonra çoxmərtəbəli binaların alıcılarının sayı azalacaq. Bu, insanlarda psixoloji travma yaradıb. Ona görə də həyət evinə meyl edənlərin sayı çoxalacaq. Amma bu, həyət evlərinin satış qiymətinin sürətli formada artacağını deməyə əsas vermir. Bazarın öz məzənnəsi var. Təbii ki, qiymət artımı ola bilər. Amma bu çox böyük rəqəmlərlə ifadə olunmayacaq. Onsuz da Bakı və Abşeron yarımadasında daşınmaz əmlakların qiyməti yetərincə bahadır. Mərkəzdəki villa tipli həyət evlərinin qiyməti yüz minlərlə, hətta milyonlarla ölçülür. Bu da hamı üçün əlçatan deyil. Xüsusən çıxarışı olmayan həyət evləri var ki, onların qiyməti nisbətən ucuzdur. Həmin tikililərin qiyməti də hər il təbii formada artır. Buna səbəb isə tikinti materiallarının qiymətinin yüksəlməsi, eləcə də yararlı torpaq sahələrinin məhdud olmasıdır. Fərdi həyət evlərində qiymət artımları adətən aprel-may aylarından başlayır və avqust ayına qədər davam edir. Lakin Türkiyədəki zəlzələ Azərbaycanın əmlak bazarına öz mənfi təsirini göstərib və süni formada qiymət artımının qarşısını alacaq. Odur ki, qiymətlərin real bazar qiymətinə qədər enməsi mümkündür”.
Günel CƏLİLOVA
