Məlum olduğu kimi, Prezident İlham Əliyev “Əmək pensiyalarının indeksləşdirilməsi haqqında” sərəncam imzalayıb. Sərəncama əsasən, bütün növ pensiyalar indeksləşdirilərək 14,7 faiz artırılıb.
Dövlət Sosial Müdafiə Fondunun (DSMF) sədri Himalay Məmişov fevralın 10-da keçirilən mətbuat konfransında qeyd edib ki, aparılan islahatlar nəticəsində əlilliyə görə pensiyaların orta məbləği 423 manata, yaşa görə pensiyaların orta məbləği 456 manata çatıb: "Orta pensiyanın məbləği ötən illə müqayisədə 14 faiz, 5 il öncə ilə müqayisədə isə 2 dəfəyə yaxın artıb".
Məlumat üçün bildirək ki,1 milyon pensiyaçını əhatə edən bu yeni artımlar üçün illik əlavə olaraq 728 milyon manat xərclənəcək.
Qeyd edək ki, yeni qanunla bu ilin əvvəlindən pensiya artımı sahəsində vahid indeksasiya metoduna keçilməsi hər il indeksləşdirmə əsasında pensiya artımının ilk dəfə olaraq bütün növ pensiyalara şamil olunmasına imkan verib.
“Pensiyaların 14,7 faiz indeksləşdirilməsi birbaşa təqaüdçülərin maddi vəziyyətinin yaxşılaşmasına səbəb olacaq”
Bütün növ pensiyaların artırılmasının əhəmiyyəti haqqında millət vəkili Aydın Hüseynov “Bakı-Xəbər”ə açıqlamasında bunları qeyd etdi: “Ölkə başçısının sərəncamı ilə pensiyaların indeksləşdirilməsi ilk növbədə həmin kateqoriyadan olan şəxslərə dövlət qayğısının bariz nümunəsidir. Məlumdur ki, dövlət büdcəsinin təxminən 40 faizə qədəri sosial xərclərə ayrılır. Bu isə onun göstəricisidir ki, dövlət daim həssas təbəqəni nəzarətdə saxlayır, onların sosial rifahı üçün lazım olan addımları atır. Pensiyaların 14,7 faiz indeksləşdirilməsi birbaşa təqaüdçülərin maddi vəziyyətinin yaxşılaşmasına səbəb olacaq”.
Millət vəkili onu da əlavə etdi ki, bu ildən ilk dəfə olaraq maddi yardımların pensiyaların tərkibinə daxil edilməsi və qulluq əlavəsi alan şəxslərin pensiyasının indeksasiya olunması həyata keçiriləcək.
Günel CƏLİLOVA
