Qiymətli daşların, qiymətli metalların, o cümlədən qiymətli daşlardan və qiymətli metallardan hazırlanmış məmulatların və mədəniyyət məhsullarının alqı-satqısının yalnız nağdsız qaydada həyata keçiriləcək həddi müəyyənləşib.
Bu, Prezident İlham Əliyevin tətbiqi barədə sərəncam imzaladığı “Nağdsız hesablaşmalar haqqında” qanuna dəyişiklikdə əksini tapan yeni - 3.4.15-ci maddədə qeyd edilib. Qanuna əsasən, qiymətli daşların, qiymətli metalların, o cümlədən qiymətli daşlardan və qiymətli metallardan hazırlanmış məmulatların və mədəniyyət məhsullarının alqı-satqısı üzrə ümumi məbləği 15 min manatdan artıq olan ödənişlər yalnız nağdsız qaydada həyata keçiriləcək.
“Qiyməti yüksək olan məhsulların satışının nağdsız şəkildə həyata keçməsinin əsas məqsədi vergidən yayınmanın qarşısını almaqdır”
15 min manatdan baha olan daşınar əmlakın nağdsız qaydada satışının həyata keçiriləcəyi barədə fkir bildirən millət vəkili Vüqar Bayramov “Bakı-Xəbər”ə açıqlamasında qeyd etdi ki, “Nağdsız hesablaşmalar haqqında” qanuna dəyişiklik edilməsinin məqsədi hesablaşmanın nağdsız qaydada həyata keçirilməsidir. Nağdsız hesablaşmalar iqtisadiyyatın şəffaflaşması baxımından vacibdir. Həmçinin, bu sektorda vergidən yayınmanın qarşısının alınması baxımından qanuna edilən məlum dəyişiklik çox əhəmiyyətlidir: “Onu da deyim ki, hazırda dəyəri yüksək və bahalı olan daşınar əmlakın nağdsız şəkildə ödənilməsi təcrübəsi tətbiq olunub. Belə bir təcrübə əksər inkişaf etmiş ölkələrdə də uğurla tətbiq edilir. Qiyməti yüksək olan məhsulların satışının nağdsız şəkildə satışının həyata keçməsinin əsas məqsədi vergidən yayınmanın qarşısını almaqdır”.
Millət vəkili hesab edir ki, bütün iaşə obyektləri nağdsız ödənişə üstünlük verməlidir. Nağdsız ödənişdən yayınan obyektlər vergidən də yayınır. Bu səbəbdən də həmin dükan, iaşə obyektləri ilə bağlı sərt cəzalar tətbiq edilməlidir: “Qiymətli daşların, qızılların satışının nağd deyil, nağdsız formada həyata keçməsi həmin məhsulların satış qiymətinə təsir etməyəcək”.
Günel CƏLİLOVA
