07/02/2023 13:25
728 x 90

Prezident nə qədər vətəndaşı "geriyə pensiya qaytarmaq" yükündən xilas etdi…

img

Xəbər verildiyi kimi, Azərbaycanda pensiyaçılara 2020-ci ildən əvvəl verilən artıq ödənişlər geri istənilməyəcək. Bu, Prezident İlham Əliyevin “Əmək pensiyaları haqqında” qanuna dəyişikliyi təsdiqləməsi ilə mümkün olub.

Dəyişikliklər əmək pensiyasına (əmək pensiyasına əlavəyə) görə artıq ödənilmiş məbləğin tutulması müddətinin məhdudlaşdırılması, bununla da son üç ildən əvvəlki dövrlə bağlı ödənişə amnistiyanın (güzəştin) tətbiq edilməsi məqsədi daşıyır. Yəni artıq ödənilmiş əmək pensiyasının və əmək pensiyasına əlavənin məbləğinin tutulmasında müddətli amnistiyanın tətbiqini nəzərdə tutur. Pensiyaçıya fərqli səbəblərdən 2020-ci ildən əvvəl artıq ödəniş olubsa, yeni dəyişikliklərə əsasən həmin ödəniş geri istənilməyəcək.

  • Pərviz Heydərov: “Geri ödəmələrin aradan götürülməsi ölkədə yüksək səviyyəli sığorta-pensiya sisteminin formalaşdırılması istiqamətində görülən işlər çərçivəsində diqqətəlayiq hadisədir”

Məsələnin əhəmiyyəti haqqında danışan iqtisadçı ekspert Pərviz Heydərov “Bakı-Xəbər”ə açıqlamasında bildirdi ki, sözügedən dəyişikliyin bir sıra  əhəmiyyəti var: “Vaxtilə pensiyaların hesablanması və təyin edilməsi zamanı yol verilən qanunsuzluqlar nəticəsində büdcədən ödənilmiş artıq vəsaitlərin geri ödənilməsindən imtina olunmaqla dövlətimiz vətəndaşlarına münasibətdə daha bir güzəştə gedir. Əslində, bu çox böyük bir "amnistiyadır" desəm, bəlkə daha düzgün olar”.

P.Heydərov hesab edir ki, artıq vəsait ödənişi həm də vaxtilə bu sahədə məsul olan müvafiq dövlət strukturunun günahı sayılır. Belə hallar ötən 10 illik ərzində baş verib. Sözsüz ki, bu həm də pensiya-sığorta sistemindəki çatışmazlıqların nəticəsi idi: “Məlumdur ki, 2019-cu ildən etibarən sözügedən sahədə köklü dəyişikliklər - islahatlar başlandı. Bütün bunlar getdikcə daha təkmil xarakter alır. Odur ki, 2020-ci ilə qədər qanunsuz şəkildə artıq ödənişlər əldə edənlərə qarşı geri ödəmələrin aradan götürülməsi ölkədə yüksək səviyyəli sığorta-pensiya sisteminin formalaşdırılması istiqamətində görülən işlər çərçivəsində diqqətəlayiq hadisədir”.

  • Aydın Hüseynov: “Bu sərəncamın mahiyyəti ondan ibarətdir ki, ölkə başçısı İlham Əliyev həssas təbəqəyə daim diqqət göstərir”

Millət vəkili Aydın Hüseynov “Bakı-Xəbər”ə açıqlamasında qeyd etdi ki, yeni sərəncama əsasən, 2020-ci ildən əvvəl verilən artıq ödənişlər geri istənilməyəcək: “Bu sərəncamın mahiyyəti ondan ibarətdir ki, ölkə başçısı İlham Əliyev həssas təbəqəyə daim diqqət göstərir. Onu da deyim ki, bu kimi proseslərin tənzimlənməsi mexanizmi mükəmməl hazırlanmalıdır. Artıq ödənişlər kimi halın baş verməməsi üçün mexanizmə xüsusi diqqət göstərilməlidir. Nəzərə almaq lazımdır ki, artıq ödəniş əlavə problemlərin yaranmasına səbəb olur. Ümumiyyələ, mühasibatlıq sistemi yeni qaydada qurulmalıdır. Bu kimi tədbirlərin həyata keçməsi nəticəsində ödənişlərdə hər hansı bir problem yaşanmaz”.

Günel CƏLİLOVA

Peşə etikası

Son xəbərlər