Azərbaycanın ölkə başçısının Davos Forumunda iştirakı və verdiyi mesajlar əsas müzakirə mövzularından biridir.
Azərbaycanın Avropanın enerji təhlükəsizliyində oynadığı rolu və bu rolun artan istiqamətdə davam etməsi Avropa İttifaqı rəsmiləri tərəfindən müxtəlif sessiyalarda vurğulanıb.
Avropanın enerji təchizatında mühüm istiqamət olan elektrik enerjisi ilə təminatda da Azərbaycanın rolu yüksək qiymətləndirilib. Xüsusilə də Azərbaycanın bərpa olunan enerji sahəsində potensialı və gücü barədə ətraflı müzakirələr aparılıb.
Xəzər dənizində ölkəmizin malik olduğu külək əsaslı bərpaolunan enerji potensialı, işğaldan azad edilmiş ərazilərimizdəki günəş əsaslı bərpaolunan enerji potensialı, Davos forumunun xüsusi diqqət mərkəzində olub.
Azərbaycanın bərpa olunan enerji sahəsindəkı göstəriciləri gələcək üçün hansı perspektivlər açır?
İqtisadçi Elçin Qurbanov “Bakı-Xəbər”ə bildirdi ki, bütövlükdə, Azərbaycanın beynəlxalq enerji şirkətləri ilə imzaladığı anlaşma memorandumları və sazişlər ölkəmizə 22 qiqavata qədər külək və günəş enerjisini istehsal etmək imkanını yaradacaq: “Bu məqsəd üçün ixrac marşrutları lazımdır. Azərbaycan, Gürcüstan, Macarıstan və Rumıniya arasında Gürcüstanın Qara dəniz sahilindən Rumıniyanın Qara dəniz sahilinə qədər “Qara dənizin dibi ilə elektrik kabelinin çəkilməsinə dair” Saziş imzalanıb. Azərbaycanda investisiya mühitinin çox müsbət olduğunu qeyd edən Prezident neft və qaz sektoruna böyük sərmayələr cəlb edildiyini, hədəfimizin isə bərpaolunan enerji olduğunu vurğulayıb. Cənab Prezident planlarımızın böyük olduğunu və bu işlərin öhdəsindən gələcəyimizə əminliyini ifadə edib.
Azərbaycanın bu mötəbər beynəlxalq tədbirə dəvət olunması Prezident İlham Əliyevin rəhbərliyi ilə sürətlə inkişaf edərək mühüm beynəlxalq layihələrin müəllifinə və təşəbbüskarına çevrilən ölkəmizin dünya miqyasında artan nüfuzunun göstəricisidir. Zəngin neft-qaz potensialı ilə Avropanın enerji təhlükəsizliyində mühüm rol oynayan Prezident İlham Əliyevin uzaqgörən siyasəti nəticəsində bu sahədə imkanlarını daha da şaxələndirir və əsasən, yaşıl enerjinin önəmli təchizatçısına çevrilməyi planlaşdırır. Azərbaycanın 200 qiqavata yaxın bərpaolunan enerji potensialı ölkəmizi dünyanın diqqət mərkəzinə çevirib. Bu zəngin potensialdan istifadə olunmasına artıq başlanılıb. 240 MVt gücündə "Xızı-Abşeron" Külək Elektrik Stansiyasının, 230 MVt gücündə “Qaradağ” Günəş Elektrik Stansiyasının təməli qoyulub. “Qaradağ” Günəş Elektrik Stansiyası Birləşmiş Ərəb Əmirliklərinin bu sahədə tanınmış “Masdar” şirkəti tərəfindən inşa edilir.
Prezident İlham Əliyevin yürütdüyü enerji siyasətinin əsas istiqamətlərindən biri də işğaldan azad olunan ərazilərin potensialının qiymətləndirilməsi və istifadə olunmasıdır. Yaxın vaxtlarda Cəbrayıl rayonunda 240 MVt gücündə “Şəfəq” Günəş Elektrik Stansiyasının istifadəyə verilməsi planlaşdırılır.
Ötən il dekabrın 17-də Buxarestdə yaşıl enerji ilə bağlı strateji tərəfdaşlıq haqqında Sazişin imzalanması da bu istiqamətdə atılan mühüm addımlardan biri oldu. Bu layihə ilə Azərbaycanın bu sahədə qarşıya qoyduğu əsas hədəf ixrac həcminin genişləndirilməsidir. Beləliklə, bərpaolunan enerji sahəsində zəngin potensiala sahib olan Azərbaycan bu istiqamətdə də reallaşdırdığı layihələrlə enerji təhlükəsizliyinin təmin olunmasında mühüm aktor kimi öz fəaliyyətini durmadan genişləndirir. Davos Forumunda Azərbaycanın bu sahədə oynasığı və bundan sonra oynaya biləcəyi rola xüsusi önəm verildi. Bu sahənin inkişafı Azərbaycan iqtisasiyyatı üçün yalnız müsbət dividentlər vəd edir”.
Məhəmmədəli QƏRİBLİ
