“Biz Azərbaycanda bərpaolunan enerji mənbələrini öz enerji təhlükəsizliyimizin təmin olunması üçün inkişaf etdirmirik”. Bunu Prezident İlham Əliyev Birləşmiş Ərəb Əmirliklərinin paytaxtında keçirilən Əbu-Dabi Dayanıqlılıq Həftəsinin rəsmi açılışında çıxışı zamanı deyib.
Ölkə başçısının sözlərinə görə, bu sahənin inkişaf etdirilməsində 2 məqsəd var: “Enerji təhlükəsizliyimizi hələ bir neçə il əvvəl təmin etmişik. Bu gün Azərbaycan nəinki öz enerji tələbatlarını təmin edir, o cümlədən xam nefti, neft məhsullarını, təbii qazı, neft-kimya məhsullarını və elektrik enerjisini ixrac edir. Bərpaolunan enerji ilə bağlı proqramımız tamamilə fərqli gündəliyə malikdir. Birincisi, bu onunla bağlıdır ki, nəhəng potensial var. İkincisi, biz onun sayəsində ixracımızı şaxələndirəcəyik. Əlbəttə ki, nəticədə iqtisadiyyatımızın yeni ekoloji təmiz sektoru yaranacaq”.
Bütün bunlar sözügedən sahənin böyük potensiala malik olduğunu bir daha ortaya qoyur.
“Alternativ enerji sahəsi ilə bağlı ölkədə həyata keçirilən meqa layihələr böyük potensialı özündə ehtiva edir”
Məsələyə münasibət bildirən iqtisadçı-ekspert Fuad İbrahimovun fikrincə, ölkə başçısının alternativ enerji mənbələri ilə bağlı səsləndirdiyi fikirlər iqtisadi reallıqlara əsaslanır: “Məsələ ondadır ki, bəli, həqiqətən biz Azərbaycan olaraq öz enerji təhlükəsizliyimizi təmin etmişik. Bununla bağlı ciddi, böyük infrastruktur qurulub. Həmçinin, bütün bunları düzgün formada dövriyyəyə cəlb edə bilmişik. Ancaq bizim enerji resurslarımız o qədər böyük və çoxşaxəlidir ki, bundan ixrac məqsədi üçün istifadə etməmək doğru olmaz. Söhbət zəngin bərpaolunan enerji mənbələrindən gedir. Bu gün Avropa İttifaqı ölkələri enerji təhlükəsizliyi problemi ilə üzləşirlər. Avroittifaqın iqtisadiyyatı böyüdükcə, enerjiyə olan tələbat daha da artır. Bütün bunlar isə Azərbaycan üçün etibarlı və dayanıqlı bazar deməkdir. Yəni bu həm də o deməkdir ki, Azərbaycan təkcə neft-qaz ixrac etmir. Biz həm də Avropaya elektrik enerisi ixrac edəcəyik. Özü də ekoloji baxımdan təmiz enerji. Bunun sayəsində ixrac imkanlarımız şaxələnəcək, təkcə neft və qaz ixracının ümidinə qalmarıq. Bütün bunlar həm də iqtisadiyyatın, o cümlədən ixracın diversifikasiyası baxımından mühüm əhəmiyyət kəsb edir. Gör bu sahə nə qədər perspektivlidir ki, alternativ enerji resurslarımıza xarici investorlar sərmayə qoyuluşuna xüsusi maraq göstərirlər. Bununla bağlı Səudiyyə Ərəbistanının və Birləşmiş Ərəb Əmirliyinin şirkətləri ilə müqavilə imzalanıb. Böyük Britaniya işğaldan azad olunmuş ərazilərdə alternativ enerji sektorunun inkişaf etdirilməsinə xüsusi maraq göstərir. Biz nəzərə almalıyıq ki, Avropada ekoloji cəhətdən təmiz olan enerjiyə xüsusi maraq var. Özü də bu mənbələrdən əldə olunan enerji tükənən deyil. Vəziyyətə uyğun buna tələbat var. Bir çox ölkələr enerjiyə olan tələbatı idxal hesabına təmin edir. Azərbaycan yaranan bu imkanlardan istifadə etməlidir. Bununla bağlı ölkədə həyata keçirilən meqa layihələr böyük potensialı özündə ehtiva edir. Çünki bu mənbələr neft sektoruna alternativdir”.
İqtisadçı-ekspert onu da əlavə etdi ki, Azərbaycanın bu sahədə artan rolu beynəlxalq müstəvidə mövqelərimizi daha da möhkəmləndirəcək.
Vidadi ORDAHALLI
