Məlum olduğu kimi, yanvarın 10-da Prezident İlham Əliyev yerli televiziya kanallarına müsahibə verib. Müsahibə zamanı bir sıra məsələlərə toxunan Prezident o cümlədən qeyd edib ki, 60 minə yaxın ailə dövlətdən ünvanlı sosial yardım alır:
“Bu gün 60 minə yaxın ailə dövlətdən ünvanlı sosial yardım alır və ildən-ilə bu yardımın məbləği artır. Yəni bu il bir ailəyə düşən müavinət təqribən 460 manat səviyyəsindədir və əlbəttə ki, il ərzində artacaq”.
Aztəminatlı ailələrə ünvanlı sosial yardımın verilməsi həmin ailələrin sosial rifahının müdafiəsi üçün nə deməkdir?
“Ehtiyacı olan insanlara ünvanlı sosial yardım verilməsi həmin kateqoriyadan olan insanların sosial təminatının yüksəlməsinə səbəb olacaq”
İqtisadçı ekspert Xalid Kərimli “Bakı-Xəbər”ə açıqlamasında qeyd etdi ki, 60 min ailənin dövlətdən ünvanlı sosial yardım alması təqdirəlayiq haldır: “Ötən ildən fərqli olaraq bu il ehtiyac meyarı ilə yaşayış minimumu eyniləşdirilib. Bu isə o deməkdir ki, ehtiyac meyarı yaşayış minimumdan aşağı deyil”.
İqtisadçı onu da əlavə etdi ki, hökumətin ehtiyacı olan ailələri düzgün müəyyənləşdirməsi və onlara sosial müavinət verməsi olduqca vacibdir. Bu o deməkdir ki, dövlət sosial yönümlü layihələrini davam etdirir: “Ümumiyyətlə, ünvanlı sosial yardımın verilməsi həssas təbəqədən olan insanların həyat şəraitinin yaxşılaşdırılmasına imkan yaradır. Ünvanlı sosial yardım aztəminatlı ailələrə dövlət tərəfindən göstərilən pul yardımıdır. Ünvanlı sosial yardımı almaq hüququna orta aylıq gəliri onlardan asılı olmayan səbəblərdən hər bir ailə üzvü üçün ehtiyac meyarının məcmusundan aşağı olan aztəminatlı ailələr malikdir”.
Ekspertin sözlərinə görə, bu il ehtiyac meyarı ilə yaşayış minimumu eyniləşdirilib: “Ehtiyac meyarının yaşayış minimumu ilə eyniləşdirilməsi yoxsulluqla mübarizədə çox ciddi bir hadisədir. Azərbaycan hökumətinin sosial siyasətində aktiv sosial müdafiə tədbirləri prioritet təşkil edir. Ümumilikdə ünvanlı sosial yardımların bir ailəyə düşən orta aylıq məbləği 2022-ci ilin müvafiq göstəricisi ilə müqayisədə bu il 36 faiz artıb”.
X.Kərimli onu da əlavə etdi ki, ehtiyacı olan insanlara ünvanlı sosial yardım verilməsi həmin kateqoriyadan olan insanların sosial təminatının yüksəlməsinə səbəb olacaq.
Günel CƏLİLOVA
