"Biz gözləyirik ki, bu il Azərbaycanda orta aylıq əməkhaqqı 900 manatdan çox olacaq". Bu barədə Prezident İlham Əliyev yerli televiziya kanallarına müsahibəsində bildirib.
Prezident qeyd edib ki, ünvanlı sosial yardımın verilməsi ilə bağlı çox böyük şəffaflaşdırma işi aparılıb: “Əvvəlki dövrlərdə bu sahədə çox böyük pozuntulara yol verilmişdi. Ehtiyacı olmayan insanlara sosial yardım verilirdi və əlbəttə ki, bunun arxasında təmənna dayanırdı. Ehtiyacı olan insanların isə buna əli çatmırdı. Ona görə bu sahədə çox geniş təftiş işi aparılıb. Bu gün 60 minə yaxın ailə dövlətdən ünvanlı sosial yardım alır və ildən-ilə bu yardımın məbləği artır. Yəni, bu il bir ailəyə düşən müavinət təqribən 460 manat səviyyəsindədir və əlbəttə ki, il ərzində artacaq, o cümlədən orta aylıq əməkhaqqı da. Biz gözləyirik ki, bu il Azərbaycanda orta aylıq əməkhaqqı 900 manatdan çox olacaq. Beləliklə, sosial sahədə bu addımları ataraq həm ehtiyacı olan insanlara arxa-dayaq oluruq, eyni zamanda, biz öz siyasətimizə sadiqliyimizi göstəririk”.
“2023-cu ilin ikinci yarısından etibarən Azərbaycanda orta aylıq əmək haqqının 900 manat olması gözlənilir”
Cari il ərzində Azərbaycanda orta aylıq əməkhaqqının 900 manatdan çox olacağı barədə fikir bildirən millət vəkili Vüqar Bayramov “Bakı-Xəbər”ə açıqlamasında qeyd etdi ki, ötən ilin ilk 10 ayının göstəriciləri göstərir ki, orta aylıq əmək haqqı 828 manat olub. Bu isə əvvəlki illə müqayisədə 14,5 faiz artım deməkdir. Nəzərə almaq lazımdır ki, minimum əmək haqqı 15 faiz artdı. Bütün bu göstəricilər onu deməyə əsas verir ki, ilin sonuna qədər orta aylıq əmək haqqı 900 manata çatacaq. 2023-cu ilin ikinci yarısından etibarən Azərbaycanda orta aylıq əmək haqqının 900 manat olması gözlənilir. Bu istiqamətdə lazımi işlər aparılır”.
Millət vəkili hesab edir ki, orta aylıq əmək haqqının qalxması əhalinin sosial təminatı baxımından vacibdir. Orta aylıq əmək haqqı məblığinin artması Azərbaycanın regiondakı mövqeyinin güclənməsinə səbəb olacaq.
V.Bayramov onu da əlavə etdi ki, orta aylıq əmək haqqının qalxması pensiyaların daha yüksək faizlə indeksasiya edilməsinə səbəb olacaq. Bu səbəbdən də orta aylıq əmək haqqındakı artım sosial baxımdan vacibdir. Bu, əhalinin sosial təminatının gücləndirilməsində əsas göstəricilərdən biri kimi istifadə olunur.
Günel CƏLİLOVA
