Gələn aydan Azərbaycanda yerli bankların və xarici bankın yerli filiallarının fiziki şəxslərin əmanətləri üzrə ödədiyi illik faiz gəlirləri vergiyə cəlb edilə bilər.
Xatırladaq ki, sözügedən gəlirlər 2016-cı il fevralın 1-dən 7 il müddətinə vergidən azad edilib.
Xatırladaq ki, əmanət faizlərinin vergidən azad edilməsi manatın 2015-ci ildəki ikili devalvasiyasından sonra banklardan əmanət axınının qarşısını almaq üçün atılmış addımlardan biridir. Bundan başqa, 2016-cı il martın 4-dən 2021-ci il aprelin 5-nə qədər Azərbaycanda əmanətlər tam sığortalı olub.
Ekspertlər bildirir ki, əmanətlər vergiyə cəlb ediləndən sonra bu hal bank əmanətlərinin həcminin azalmasına səbəb olacaq. Depozitçilər banklarda olan əmanətlərini geri çəkəcək və ya insanlar əlində olan vəsaiti banka yerləşdirməkdən çəkinəcək. Beləliklə, əmanətlərin həcmi azalacaq.
“Bank əmanətlərinin vergiyə cəlb olunması depozitlərin həcminə təsir etməyəcək”
Bank məsələləri üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, bank əmanətlərinin vergiyə cəlb olunması düzgün addım olar: “Nəzərə almaq lazımdır ki, vətəndaş əldə etdiyi gəlir üzrə vergiyə cəlb olunmalıdır. Vətəndaşın evi varsa o əmlak vergisi verir, icarəyə obyekt verirsə icarə vergisi ödəyir. Bir sözlə, vətəndaş gəlir əldə edirsə, o bir qayda olaraq vergi ödəməlidir. Bankda əmanəti olan şəxs o deməkdir ki, onun gündəlik xərcindən əlavə pulu var. Belə olan halda niyə həmin şəxsdən vergi tutulmasın?”
Ekspert hesab edir ki, əmanətçilərdən vergi tutulmaması yanaşması düzgün deyil: “Ümumiyyətlə, Azərbaycanda əmanətçilərə münasibət düzgün deyil. Belə ki, vətəndaş dollar almaq üçün banka gedir, ancaq həmin şəxs illik 20 mindən çox dollar ala bilməz. Əks halda gəlirini sübut etməlidir. Ancaq banka 100 minlərlə, hətta daha çox əmanət qoyanlar var. Onlardan gəlir barədə heç bir sorğu-sual edən yoxdur”.
Ə.Həsənovun fikrincə, bank əmanətlərinin vergiyə cəlb olunması depozitlərin həcminə təsir etməyəcək. Məlumat üçün qeyd edim ki, əmanətlər üzrə faiz ortalama illik 10 faizdir. Belə olan halda əmanətçi 10 faizin 1 faizini vergiyə verəcək. Bu elə də böyük rəqəm deyil. Bu səbəbdən də əmanətlərin həcmində azalma müşahidə edilməyəcək.
Günel CƏLİLOVA
