Azərbaycan dövləti mütəmadi olaraq şəhid ailələrinə yönəlik sosial dəstək paketləri təqdim edir. Cəmiyyətimizin həssas qrupu pilləsində yer alan şəhid ailələri hər zaman dövlət qayğısı ilə əhatə olunur. İndiyə qədər şəhid ailələrinin sosial rifah halının yüksəldilməsi, mənzil şəraitlərinin yaxşılaşdırılması, mənzillərlə, təqaüdlərlə təmin olunması prosesinin şahidi olmuşuq.
Bununla yanaşı, bir sıra istiqamətlərdə şəhid ailələri üçün güzəştlər də tətbiq edilir. Bu sıraya yenisi də əlavə olunub. Belə ki, şəhid ailələrinə gəlir vergisi üzrə güzəştlər veriləcək.
Dövlət Vergi Xidmətindən verilən məlumata görə, 2023-cü il üçün Vergi Məcəlləsində nəzərdə tutulan dəyişikliklərdən biri də şəhid statusu verilmiş şəxsin valideynlərinin, dul arvadlarının (ərlərinin) və övladlarının vergi tutulmalı olan aylıq gəlirləri (əməkhaqqı gəlirləri) ilə bağlı 800 manat məbləğində vergi güzəştinin verilməsi, 1990-cı il yanvarın 20-də SSRİ qoşunlarının müdaxiləsi nəticəsində, habelə Azərbaycan Respublikasının ərazi bütövlüyünün müdafiəsi zamanı həlak olmuş şəxslərin valideynləri və arvadları (ərləri) ilə yanaşı, övladlarına da vergi tutulmalı olan aylıq gəlirləri (əməkhaqqı gəlirləri) ilə bağlı güzəştlərin verilməsidir.
Sosial cəhətdən həssas əhali qruplarının, o cümlədən müharibə ilə əlaqədar əlilliyi olan şəxslərin, şəhid ailələrinin, müharibə veteranlarının və digər formada zərərçəkmiş şəxslərin sosial müdafiəsinin gücləndirilməsi ölkəmizdə həyata keçirilən sosial siyasətin əsas istiqamətlərindən birini təşkil edir.
Məlum olduğu kimi, Azərbaycanın ərazi bütövlüyü və müstəqilliyi uğrunda canından keçmiş şəxslərin ailələrinə, həmçinin müharibə əlillərinə dövlət tərəfindən hər zaman böyük diqqət və qayğı göstərilir. Belə ki, sağlamlıqlarını torpaq uğrunda itirən Qarabağ əlillərinin mənzil-məişət şəraiti yaxşılaşdırılır, şəhid ailələri və müharibə əlillərinə mütəmadi olaraq yeni mənzillər, avtomobillər verilir, habelə onların müalicəsi üçün reabilitasiya mərkəzləri açılır və digər sosial tədbirlər həyata keçirilir. Bu siyasətin davamı olaraq şəhid ailələrinə dövlət qayğısının daha da artırılması, onların sosial rifah səviyyəsinin yüksəldilməsi istiqamətində atılan addımlardan biri kimi, bu kateqoriyadan olan şəxslərin aylıq gəlirlərinin 800 manat olan hissəsinin gəlir vergisindən azad edilməsi nəzərdə tutulur.
Eyni zamanda, 1990-cı il yanvarın 20-də SSRİ qoşunlarının müdaxiləsi nəticəsində, habelə Azərbaycan Respublikasının ərazi bütövlüyünün bərpası zamanı həlak olmuş şəxslərin valideynləri və arvadları (ərləri) ilə yanaşı, övladlarının da hər hansı muzdlu işdən vergi tutulmalı olan aylıq gəliri 100 manat məbləğində azaldılacaq. Belə ki, hazırda 100 manat məbləğində gəlir vergisi üzrə azadolma yalnız bu kateqoriya üzrə şəxslərin valideynlərinə və arvadlarına (ərlərinə) münasibətdə tətbiq edilir.
Şəhid ailələrinə gəlirdən vergi güzəştinin edilməsi dövlətin növbəti addımıdır və bununla növbəti sosial paketə dəstək verilib.
“Şəhid ailələrinə, hər iki müharibədə əzizlərini itirmiş insanlara ediləcək vergi güzəştləri ikiqat təqdirəlayiq haldır”
Liberal İqtisadçılar Mərkəzinin rəhbəri Akif Nəsirli “Bakı-Xəbər”ə şərhində bildirdi ki, dövlətin şəhid aiələri ilə bağlı qəbul etdiyi bu qərar müsbət qarşılanmalıdır. Dövlətin həssas qrupa daxil olan şəhid aiələrinə tətbiq edəcəyi bu güzəşt müsbət qəbul edilməlidir. “Əlbəttə, dövlətin vətəndaşların bu həssas zümrəsinə tətbiq edəcəyi vergi güzəştləri bütün hallarda təqdirəlayiq bir haldır. Yəni dövlətin bir addımından ki, vətəndaş faydalanır, bu müsbət bir haldır və vətəndaş məmnunluğunu təmin etməyin bir elementidir. Şəhid ailələrinə, hər iki müharibədə əzizlərini itirmiş insanlara ediləcək vergi güzəştləri iki qat təqdirəlayiq haldır. Bu həmin qrupa aid olan vətəndaşlarımızın gəlirlərinin artmasına səbəb olacaq. Burada həm əməkhaqqından tutulan gəlir vergisindən söhbət gedir, bu həm də əgər o aiələrin üzvləri iqtisadi fəaliyyətlə məşğuldursa orada yaranan vergi öhtəliklərinə aiddir. Həmin vergi öhtəliklərinin 800 manatı həcmində bu zümrəyə aid olan vətəndaşlara vergi güzəştləri tətbiq ediləcəkdir. Bu həm şəhid ailələrinin gəlirlərinin artmasına səbəb olacaq, həm də onların iqtisadiyyatla məşğul olmasını stimullaşdıran bir amil kimi çıxış edəcək”.
A.Nəsirlinin sözlərinə görə, Birinci və İkinci Qarabağ müharibələrində, eləcə də vətənin, dövlətin ərazi bütövlüyü uğrunda şəhid olanların ailələrinə, sağlamlığını itirmiş şəxslərin özlərinə, ailə üzvlərinə, yaxınlarına bu istiqamətdə güzəştlərin tətbiq edilməsi, onların sosial-məişət şəraitinin yaxşılaşdırılması yönündə atılan bütün addımlar müsbətdir, təqdirəlayiqdir. “Bütün bunlar müsbətdir. Amma bir məsələni də qeyd edim ki, biz hələ onlara onları tam məmnun edəcək qədər təminat verə bilməmişik” - deyə A.Nəsirli vurğuladı.
O hesab edir ki, şəhid ailələrinə yönəlik sosial paketlərin sayı, maliyyə dəstəyinin həcmi də artmalıdır, çünki bu qəbildən olan ailələr daha firavan həyat şəraitinə, yaşayışa layiqdir.
Leyla QARAXANLI
