Son günlər Rusiyanın milli valyutası ABŞ dolları və avro qarşısında əhəmiyyətli dərəcədə dəyər itirir. Uzun zaman idi ki, Rusiyanın milli valyutası sabit olaraq bir dollar üçün 60 rubl ətrafında qalırdı.
Rusiya Mərkəzi Bankının sədr müavini Aleksey Zabotkin qeyd edib ki, xarici şərtlərin pisləşməsi, neftin qiymətinin azalması müşahidə olunur: “Bu, məzənnənin bir qədər zəifləməsi üçün kifayət qədər əhəmiyyətli səbəbdir”.
Qeyd edək ki, rubl Azərbaycan manatı qarşısında da dəyər itirir. Dekabrda onun məzənnəsi manat qarşısında 8,7 % azalaraq 0,0253 manata düşüb. Nəzərə almaq lazımdır ki, Rusiya Azərbaycanın əsas ticarət tərəfdaşlarından biridir və qeyri-neft məhsullarının ixrac olunduğu əsas ölkədir. Bu ilin ilk 10 ayında Azərbaycandan ixrac olunan qeyri-neft məhsullarının 28,79 %-i bu ölkənin payına düşüb. Ekspertlər bildirir ki, rublun dəyər itirməsi Azərbaycan məhsullarının Rusiya bazarında bahalaşdırır və onların rəqabət qabiliyyətini aşağı salır.
Maralıdır, rublun ucuzlaşmasının Azərbaycana mənfi təsiri varmı? Bu, Azərbaycan iqtisadiyyatına necə təsir edə bilər?
“Məzənnə dəyişikliyi idxalımızı ucuzlaşdıracaq, ixracımızı bahalaşdıracaq”
İqtisadçı Xalid Kərimli bildirdi ki, Rusiyanın milli valyutasının məzənnəsi bir dollar üçün 72 rubla yaxınlaşır: "Bu proses ardıcıl bir neçə həftədir davam edir. Rublun ucuzlaşması Azərbaycanda hər hansı bir problemə səbəb olmayacaq. Məlumdur ki, Azərbaycan Rusiyadan həm idxal, həm bu ölkəyə ixrac edir. Məzənnə dəyişikliyi idxalımızı ucuzlaşdıracaq, ixracımızı bahalaşdıracaq. Bu formada təsirlər ola bilər. Amma Rusiyanın idxal-ixrac əməliyyatlarında geniş imkanlar olmadığına görə, bizim nə ixracda, nə də idxalda bazar itircəyimizi düşünmürəm. Məzənnənin bu formada olması idxalı bahalaşdıran, ixracı ucuzlaşdıran bir faktordur”.
Iqtisadçı hesab edir ki, rublun məzənnsinin dəyərdən düşməsi manata indiki halda heç bir təsir etməyəcək. Mərkəzi Bankın 2023-cü ilə dair proqnozları da bunun hər hansı ciddi təsirlər yaratmayacağını deməyə əsas verir: “Danılmaz faktdır ki, Rusiya Azərbaycanın əsas ticarət tərəfdaşlarından biridir. Belə ki, iki ölkə arasında bu ilin yanvar-noyabr aylarında ticarət dövriyyəsi 3 milyard 264 milyon 444 min dollar təşkil edib. Bu, ötən ilin eyni dövrü ilə müqayisədə 22,9% və ya 608,2 milyon dollar çoxdur. Rusiya, eyni zamanda, Azərbaycanın qeyri-neft ixracında əsas bazardır. Azərbaycan bu ilin yanvar-noyabr aylarında Rusiyaya 820 milyon dollar dəyərində qeyri-neft sektoru məhsulları ixrac edib. Bununla da Rusiya Azərbaycandan qeyri-neft məhsulları idxalında liderliyini qoruyub”.
Günel CƏLİLOVA
