Vasif Talıbovun istefasından sonra Naxçıvanda ciddi dəyişikliklərin olacağını gözlənilir. Məlumdur ki, Naxçıvanda bir sıra qadağalar mövcud idi. Təbii ki, Naxçıvan əhalisi həmin qadağalardan narahatlıq hissi keçirirdi və bundan narazı idilər. Həmin qadağalardan biri də orada yaşayan vətəndaşların öz halal haqları olan ƏDV-lərini geri ala bilməməsidir.
Maraqlıdır, ticarət və ya iaşə obyektlərindən alınmış mallara görə ödənilən ƏDV niyə Naxçıvanda geri qaytarılmır? Bunun səbəbi nədir?
Dövlət Vergi Xidməti: “Yeni nəsil kassa aparatı tətbiq olunmalıdır və sahibkarın satdığı məhsullar ƏDV-yə cəlb edilməlidir”
Dövlət Vergi Xidmətindən bildirildi ki, öncə sahibkar ƏDV ödəyicisi olmalıdır: “Yeni nəsil kassa aparatı tətbiq olunmalıdır və sahibkarın satdığı məhsullar ƏDV-yə cəlb edilməlidir. Bu şərtləri ödəyən istənilən pərakəndə ticarət və ictimai iaşə müəssisəsindən ƏDV-ni geri almaq olar”.
Əkrəm Həsənov: “Naxçıvanda ƏDV-nin geri qaytarılmaması qanunsuzdur”
Hüquqşünas Əkrəm Həsənov bildirdi ki, Naxçıvanda ƏDV-nin geri qaytarılmaması qanunsuzdur. Bu qayda bütün ölkə ərazisində tətbiq olunub: “Naxçıvan da Azərbaycan Respublikasının ərazisidir. Azərbaycanda qəbul olunan bütün qanunlar orda da tətbiq olunmalıdır. Naxçıvanın sabiq rəhbəri ƏDV-nin geri qaytarılmaması prosesinə necə müdaxilə edib? Əgər bu işi Naxçıvanın sabiq rəhbəri edibsə, onun marağı nədir? Niyə Naxçıvan Muxtar Respublikası istəməsin ki, onun vətəndaşları əlavə dəyər vergisinin bir hissəsini geri alsın? Bu mövzu ilə bağlı saysız-hesabsız suallar var. ƏDV-in geri qaytarılmaması maraqlıdır. Ya kimsə həmin çekləri özləri vurub ki, belə bir hal olubsa, bu, hüquq-mühafizə orqanları tərəfindən araşdırılmalıdı. Digər variant isə ticarət obyektlərinin vergidən yayınaraq kassa aparatını tətbiq etməməsidir”.
Həmsöhbətimiz onu da əlavə etdi ki, adıçəkilən bölgədə çoxlu sayda özbaşınalıqlar olub. Sanki həmin bölgədə feodal dövrə xas həyat yaşanılıb: “Xatırladım ki, pandemiya dövründə Naxçıvana başqa yerdən vətəndaş gedib-gələ bilməzdi, bununla bağlı məhdudiyyət qoymuşdu. Bu isə gülünc qərar idi. Artıq Naxçıvanda yeni həyat, yeni nəfəs olacaq”.
Günel CƏLİLOVA
