Bu yaxınlarda Milli Məclisdə büdcə müzakirələrinə qatılan maliyyə naziri Samir Şərifov deputatların pensiya ilə bağlı təkliflərinə münasibət bildirib. Nazir pensiya yaşının azaldılması təklifinə müsbət yanaşmayıb, bu addımın problemlərə səbəb olacağını deyib.
Nazir qeyd edib ki, pensiya yaşının süni şəkildə azaldılıb-artırılması müəyyən problemlərə səbəb ola bilər: “Biz statistikaya görə bilirik ki, ölkədə uzunömürlülük yüsəkdir. Ona görə bu statistikanı nəzərə almaq lazımdır. Biz də maraqlıyıq ki, insanlar pensiyaya çıxanda yaxşı pul alsınlar. Əvvəllər 12 il işləyən adama 25%-lə pensiya haqqı tanınırdı. Bu gün normal pensiya almaq üçün 35 il işləməlisən. Bu gün ölkədə insanlar işləyirlər, amma başa düşmürlər ki, işləməklə yanaşı pensiya fonduna da pul köçürməlisən. Bunun əsasında pensiya məbləği müəyyənləşəcək".
Nazirin açıqlaması birmənalı qarşılanmayıb.
Ekspertlər bildirir ki, son illər vəfat edənlərin əksəriyyəti pensiya yaşına çatmır. Araşdırmalar zamanı məlum olub ki, insanların daha çox hissəsi, 60-70 faizi 65 yaşına çatmadan, yəni pensiya almadan dünyasını dəyişir. Ona görə də pensiya yaşının aşağı salınmasına ehtiyac var
“Stajdan asılı olmayaraq, insan pensiya yaşına çatdığı təqdirdə hansı pensiya kapitalını yığıbsa, ona uyğun mexanizmlərlə öz pensiyasını almalıdır”
İqtisadçı Eldəniz Əmirov bildirdi ki, Azərbaycanda pensiya sisteminə yenidən baxmağa ehtiyac var: “Pensiyaya çıxmaq üçün yaş həddi yüksəkdir. Aylıq pensiyanın təyin olunması zamanı yığılmış pensiya kapitalının 144 aya bölünməsini doğru hesab etmirəm. 65 yaşında pensiyaya çıxan insanın pensiya kapitalı 12 ilə bölünür. Bu isə 77 yaş edir. Azərbaycanda isə orta yaş həddi 77 deyil. Ən azından bu məsələyə yenidən baxmaq olar. Dünya təcrübəsində pensiya ilə bağlı müxtəlif fomalar var. Bu formalar ölkələrin inkişaf səviyyəsinə görə dəyişir. Stajdan asılı olmayaraq, insan pensiya yaşına çatdığı təqdirdə hansı pensiya kapitalını yığıbsa, ona uyğun mexanizmlərlə öz pensiyasını almalıdır”.
İqtisadçı hesab edir ki, təqaüd yaşının getdikcə artırılması düzgün yanaşma deyil: “Bu məsələ tez-tez ictimai müzakirəyə çıxarılır, narazı fikirlər səslənir. Amma bütün bunlar reallığı dəyişmir. Həqiqətən də, Azərbaycanda pensiya yaşı həddindən artıq yüksəkdir”.
Günel CƏLİLOVA
