07/02/2023 13:20
728 x 90

Prezident Əliyevdən yeni geosiyasi reallıqlara növbəti qabaqlayıcı reaksiya - Azərbaycan yükdaşımaların növbəti mərhələsini açır...

Vüqar Bayramov: “Bu, daha çox yüklərin Azərbaycan üzərindən daşınmasına öz təsirini göstərəcək”

img

“Biz Azərbaycan ərazisindən yükdaşımaların sürətlə artmasını gözləyirik və buna hazırıq”. Bunu Prezident İlham Əliyev “Orta Dəhliz boyunca: geosiyasət, təhlükəsizlik və iqtisadiyyat” mövzusunda beynəlxalq konfransda sualları cavablandırarkən deyib.

Ölkə başçısının sözlərinə görə, bizim nəqliyyat-kommunikasiya layihələrinin nisbətən yeni elementi olan dəniz ticarət limanımız 15 milyon tondan 25 milyon tona qədər genişləndiriləcək: “Çünki buna zərurət var, çünki dünyada yeni geosiyasi vəziyyət mövcuddur və Azərbaycandan daha çox yüklərin daşınmasına zərurət var. Həmçinin biz hava limanları layihələrinin tamamlanması prosesindəyik. Laçın hava limanı hazır olandan sonra, - hansı ki, işğaldan azad edilmiş ərazilərdə üçüncü hava limanı olacaq, - Azərbaycanda beynəlxalq hava limanlarının sayı doqquza çatacaq. Əlbəttə ki, bu təkcə sərnişin daşımaları üçün yox, həm də yük daşımaları üçündür. Beləliklə, biz Azərbaycan ərazisindən yükdaşımaların sürətlə artmasını gözləyirik və buna hazırıq. Bakıda gəmi infrastrukturu və yeni gəmiqayırma zavodlarımızın olması ilə bağlı potensialımızı əlavə etsək, biz, əlbəttə ki, planlaşdırdıqlarımıza nail olacağımızı görəcəyik. Xəzər dənizinin şərq sahillərindən yükləri Azərbaycan ərazisindən nəql etmək üçün bizə, sözsüz ki, yeni tankerlər, bərələr və yük gəmiləri lazım olacaq”.

Görünən odur ki, yaxın perspektivdə bu istiqamətdə genişmiqyaslı işlərin görüləcəyi gözlənilir.

  • “... Ölkədə formalaşan infrastruktur, proseslərin elektronlaşması, həmçinin regiondakı düzən...”

Məsələyə münasibət bildirən millət vəkili Vüqar Bayramovun fikrincə, yükdaşımalarla bağlı gözləntilər böyükdür: “Məsələ ondadır ki, Azərbaycan üzərindən yükdaşımaların həcmində ciddi artımlar müşahidə olunur. Təkcə bu ilin 10 ayında Azərbaycan üzərindən daşınan yüklərin həcmi 34,4 faiz artıb. Eyni zamanda, işğaldan azad olunmuş ərazilərdə yeni infrastrukturun, nəqliyyat və logistik şəbəkənin formalaşması da Azərbaycan üzərindən daşınan yüklərin həcminin artmasına imkan verəcək. Füzuli, Zəngilan hava limanları və o cümlədən istifadəyə veriləcək Laçın hava limanı beynəlxalq yüklərin həcminə xüsusi təsir göstərəcək. Bu da, təbii ki, daha çox yüklərin Azərbaycan üzərindən daşınmasına öz təsirini göstərəcək. Eyni zamanda, Azərbaycanın beynəlxalq yükdaşımalardan daha çox gəlir əldə etməsinə gətirib çıxaracaq. Bu da qeyri-neft sektorunda xüsusi gəlir mənbələrinin formalaşması deməkdir. Yəni Azərbaycana daxil olan valyutanın artmasına gətirib çıxaracaq. O baxımdan artıq ölkədə formalaşan infrastruktur, proseslərin elektronlaşması, həmçinin regiondakı düzən konteksindən Azərbaycan üzərindən daşınan yüklərin həcminin artması daha çox valyutanın daxil olması deməkdir”.

Bir sözlə, millət vəkili hesab edir ki, yükdaşımalardan daha çox gəlirlərin daxil olacağı gözlənilir.

Vidadi ORDAHALLI

Peşə etikası

Son xəbərlər