06/02/2023 14:11
728 x 90

Ərzaq bazarımızda dövlət tənzimlənməsi nə deməkdir...

Eyyub Hüseynov: “Əsas məsələ ölkənin ərzaq təhlükəsizliyi və ərzağın özünün təhlükəsizliyi, yəni keyfiyyətidir”

img

Azərbaycanda ərzaq bazarı dövlət tərəfindən tənzimlənəcək. Bununla bağlı “İstehlakçıların hüquqlarının müdafiəsi haqqında” qanuna dəyişiklik edilir. Belə ki, qanuna yeni "Ərzaq bazarının dövlət tənzimlənməsi" adlı maddə əlavə olunur. Yeni maddəyə əsasən, əhalinin ərzaq təhlükəsizliyinin təmin edilməsi ilə bağlı zəruri tədbirlərin hazırlanıb həyata keçirilməsi məqsədilə ərzaq balansı tərtib olunur.

Ərzaq balansının tərtibi üçün fermerlər və tədarükçülər tərəfindən kənd təsərrüfatı məhsullarının istehsalı, habelə həmin məhsulların yetişdirildiyi istixanalar, saxlanıldığı soyuducu anbarlar və taxıl elevatorları barədə aylıq məlumatlar növbəti ayın 10-dək müvafiq icra hakimiyyəti orqanının müəyyən etdiyi orqanın informasiya sisteminə daxil edilməlidir. Ərzaq məhsullarının istehsalı, emalı, saxlanılması, idxalı, ixracı və satışı sahəsində fəaliyyət göstərən subyektlər 15 iş günü müddətində bu barədə məlumat təqdim etməlidirlər. Məlumatları təqdim etməyən şəxslər qanunla müəyyən edilmiş qaydada inzibati məsuliyyətə cəlb olunacaq.

Ərzaq bazarının dövlət tərəfindən tənzimlənməsi inflyasiyanın, eləcə də sahibkarların şəxsi mənfəət istəklərinin qarşısını ala biləcəkmi?

  • “İstehsal olunan ərzaq məhsullarının kəmiyyət və keyfiyyət göstəriciləri barədə müvafiq qurumlarda dəqiq məlumatlar olacaq”

Azad İstehlakçılar Birliyinin sədri Eyyub Hüseynov bildirdi ki, “İstehlakçıların hüquqlarının müdafiəsi haqqında” Azərbaycan Respublikasının Qanunu 1995-ci ildə qəbul olunub. Təəssüf ki, sonrakı mərhələdə qanuna edilən dəyişikliklər istehlakçıların xeyrinə olmayıb: “Bununla bağlı biz dəfələrlə müvafiq qurumların təmsilçiləri ilə müzakirələrə qatılmışıq və təkliflərimizi irəli sürmüşük.  Qanunda nəzərdə tutulan yeni dəyişiklik istehlakçıların həyatında özünün müsbət rolunu oynayacaq. Dəyişiklikdə nəzərə alınan əsas məsələ ölkənin ərzaq təhlükəsizliyi və ərzağın özünün təhlükəsizliyi, yəni keyfiyyətidir”.

Birlik sədrinin sözlərinə görə, istehsal olunan ərzaq məhsullarının kəmiyyət və keyfiyyət göstəriciləri barədə müvafiq qurumlarda dəqiq məlumatlar olacaq. Həmçinin, keyfiyyət məsələsi də  önə çəkilir: “Məlumdur ki, keyfiyyət amili həmişə bir növ diqqətdən kənarda qalırdı. Qida Təhlükəsizliyi Agentliyi yalnız ərzağın təhlükəsizliyini müəyyənləşdirir. Təhlükəsiz qida məhsullarının keyfiyyətsiz olması da istisna edilmir. Biznes qurumları isə vəziyyətdən sui-istifadə edir və qiymətləri nisbətən bazara uyğun səviyyədə saxlamaq məqsədilə keyfiyyəti aşağı salırlar. Nəzərdə tutulan dəyişiklikdə keyfiyyət məsələsi önə çəkilir ki, bu da vacib amillərdən biridir. Çox yaxşı olardı ki, müvafiq qurumlar əlbir işləsinlər və keyfiyyətdə olan problemləri birlikdə həll etsinlər. Azad İstehlakçılar Birliyi olaraq biz qanuna nəzərdə tutulan bu dəyişikliyi təqdir edirik”.

 Günel CƏLİLOVA

Peşə etikası

Son xəbərlər